Pawl thar MTM leh “Viksit Bharat 2047”

‘Hmathlir leh thil tum neia danglamna thlentir’ tum pawl pakhat – ‘Mizoram Transformation Movement’ (MTM) tih chu nimin khan a piang nawlh mai a. MTM hian thil tum pali — Mizoramah hmasawnna tluantling thlen; chhungkaw tin hmasawnna thlen; ram leh hnam humhalh leh, sawrkar tha a awm theihna tura hmalak’ tihte nei a; hei bakah hian Mizoram Vision 2050 a nei bawk a, chu chu —tun atanga kum 25-ah Mizoram hi ‘ram intodelh, hmasawn leh Pathian tih ram ni tura hmalak’ tih a ni. MTM thiltumte hi, tun lai tawng takin, ‘a tha khep khep’ hle a ni.
Kan hriat angin, India hian 2047-ah kum 100 a tling dawn a, kum 100 a tlin ruala ‘Developed India’ nih hman tumin vision pakhat “Viksit Bharat 2047” chu India sawrkarin a kalpui mup mup mek a. Mizoram pawhin “Viksit Bharat 2047” thlen diktirtu ni ve ngei turin hma kan la chho mek bawk a. “Developed India” ni tur hian kum 22 chhung hun kan la nei tihna a ni.
Mizoram sawrkar kal tawh zawng zawngte khan ‘state intodelh’ ni turin hma chu an la ve hlawm nameuh mai; mahse, tun hi kan dinhmun chu a la ni a, sawi tam a ngai awm lo ve.
Tuna MTM pawl thar lo piang hian thil tum tha tak tak leh ropui tak tak a rawn chhawp chhuak teuh mai a, hengte hi sawrkar pawhin a lo tih theih tawh lohte kha a ni a. MTM hian an vision leh mission tihlawhtling tur hian eng tin nge hma an rawn lak dawn tih hi mipuiin kan lo thlir tur chu a ni rih mai a; ‘eng emaw oriented’ te chu a ni lo turah han ngai chhin phawt ila.
‘Developed India’ a thlen chuan ‘Developed Mizoram’ pawh a thleng tel nghal dawn tihna a ni a. ‘Developed India’ nihtir thei lotu awm chhun ‘state’ te hi kan ni nulh mai ang tih te pawh a hlauhawm a. Chuvangin, thil tum ropui tak neitu MTM hi, an thiltum nena inhne rem thei tur “Viksit Bharat 2047’ hmalakna tha tichak sauh turah beisei ila a tha awm e.
Mizoram economic growth hi 11th Five Year Plan (2007-2012) chhung khan 11% a kai dawrh mai a, national average (7.9) aiin a sang daih a nih kha. Mahse, thingtlang leh khawpui khawsak phung inthlau lutuk leh, thingtlang lam an la bet reng bawk si hi, economic hian thingtlang lam a growth pui lo tihna a ni. Kan economic growth hi 11% aia sang pawh ni se, thingtlang lam hmasawnna percentage a san tel ve si loh chuan ‘nambar sâng tak’ a ni satliah mai dawn tihna a ni.