Pawngsual vanga tang turin Kristian thuhriltu hrem

Pawngsual vanga tang turin Kristian thuhriltu hrem
Indian court chuan Kristian thuhriltu, Bajinder Singh-a chu kum 2018-a hmeichhia a pawngsual avangin dam chhung tang turin a hrem.
A puhtu hmeichhia chuan Singh-a hian Punjab hmar lama a inah a pawngsual niin a sawi a, a hnuah an chet velna thla a lak hmangin a vau zui niin a sawi.
Zuitu maktaduai tel nei, Singh-a hi a thuhril dan avanga hriat hlawh niin inkhawmna lian tak tak a huaihawt thin a. Heng inkhawmnaah hian damlote pawh an lu chunga kut nghatin a ‘tidam’ thin.
Church of Glory & Wisdom dinin Punjab-ah chuan mi mal din kohhrana zuitu ngah ber a ni a, Bollywood lemchang thiam tak tak pawh telin khawvel hmun dangah pawh branch a nei nual.
A website-ah chuan US, UK leh Canada-ah pawh branch a nei a ni.
Singh-a hi social media-ah pawh a inlan nasa a, a YouTube channel chu mi maktaduai thum chuangin an subscribe mek.
Thu a sawinaah hian suit hain thuchah hriam tak tak a sawi thin a, hausa taka mi siam thei leh mi na tidam thei angin a insawi thin.
A video darhah chuan a kut chu amah zuitute chibaiin an natna sawi turin a ti a, eng anga na pawh mak takin an dam mai thin niin a lang.
Thawhlehni khan court chuan kum 2018-a pawngsual thubuaia Singh-a hremna hi puangin hmeichhe aiawha ding dan hre mi, Anil Sagar chuan thutluknaah an lawm thu a sawi.
“Vantlanga langsar tak takte hian hriat an hlawhna chu rethei zawk leh mi chak lo zawkte philna remchangah an hmang thin,” a ti.
Singh-a dan hre mite erawh chuan engmah an sawi lo va, high court-ah an khin let ngei a rinawm thung.
Thuhriltu hi hmeichhe dang pahnih velin mipat hmeichhiatna hawia an laka che mawi lovah an puh bawk a. February atang khan police chuan a zirtir thinin a puhnaah an chhui tan.
Hemi hnu ni rei vak lovah Punjab police chuan hmeichhe dangin tawngtai hun hman zawha a laka Singh-a chet dan a duh lohna a thlen thubuai an siam zui a. Heng thil pahnih hi amah chuan a pha ve ve.
A kohhran din pawh hi sum a neih danah sawi a awm fo thin a. Nikum January khan an hotu lian zual thenkhat chu India-a income-tax department-in thu an lo zawt fiah tawh.
Haryana-a Hindu chhungkuaa piang a ni a, kum 15 chuang kal ta khan lung in a tan laiin Kristianah a inlet a. Chanchinbute chuan tual thah thubuaia tang niin an sawi a, amah erawh chuan a sawi ve ngai lo.
A website-ah chuan ‘sual hnathawhin’ pawi khawihna lamah a nawr a, tu emawin Bible a pek atangin Pathian a chhar ta niin a tar lang a. A website-ah vek hian ‘zawlnei’ a inti a, tui thianghlim leh tel hmangin mi tihdam ‘inkhawm’ a buatsaih thin tih a tar lang bawk.
Pawikhawihna thubuai neuh neuh a neih avang hian chanchinbute chuan an um zui nasa a. A zuitute chuan an tan hle a, Singh-a chu a elpui pastor dangten beiin a hmingchhiatna turin ruahmanna an siam niin an sawi thin.