P&E leh mipui lam inhmuh thiam lohna enfiah nghal a ni

ngdaia thil thleng chungchanga department leh khawtlang thu inhmu fuh loh deuh awm chu Power & Electricity department chuan pawi a tih thu a sawi a. Power minister hoin department-in uluk taka zirchiangin, tun hnuah hetiang hi a thlen tawh lohna’n department lam inenfiah niin, Kolasib bawrhsap pawh an thlir dan zawh a ni tih a sawi.
P&E department thuchhuak chuan, Lungdai-a 2.5 MVA, 33/11kV transformer Sentlang Sub-Station a awm chu kumin January 14 khan eng pe chhuak thei siin, PHE tui pump-na khawl tan erawh a hman theih loh a. Department-in a endik hnu ah tha lo lai hi hmu fuhin, a chhiat chhan pawh tui pump-na khawl starting current sangin a shock vang nia hriat a ni.
Heti chung hian eng pek a ni tho a, Sentlang Sub-Station atanga power la te chuan eng an nei reng a, tui pawh diesel generator hmanga pump tho a ni tih a sawi.
Tui pump na’n leh eng tha zawka Lungdai Sentlangin an hmuh theih nan hmun danga hmanlai 3MVA 33/11kV transformer chu Sentlangah dah a ni a. Transformer hman lai sawn a nih hian oil filtration hi darkar 48 (ni hnih) tih a ngaih avangin, hman nghal theih a ni lo a, January 27-ah khawtlang hruaitute leh department hotute inhmukhawmin Bukpui Sub-Station atanga power la turin hemi zan dar 7.30 ah ruahmanna an siam a. He Sub-Station in eng a pek khuate pawhin puih inhmuamin hnatlang turin mipui an hrilh a ni.
January 28 (Pathianni) zing karah P&E duty-ten Lungmuat leh N. Chaltlang inkarah ban pakhat sang deuhah a tliak tih an hmu leh si a, ban thar phun a ngaih dawn avangin Pathianni ah chuan eng lalut hman turah an ngai lo a. Hnatlanga mipui ti hah loa thulh mai a tha tih niin, hnatlang thulh thu hi khawtlang hruaitute pawh zing dar 9.15 a hrilh hman an ni tih a sawi.
‘Hun engemawchen atang khan Sentlang transformer bik hian PHE tui pump-na hi a zawh loh avangin, a tih nun nan minute 20 chhung vel khawchhung eng pekna hi shut down a ni thin a, hemi tih ziaawm nan hian transformer hi dah belh a ni. Sentlang Sub-Station atanga eng hmu thin khuate chuan department-in ruahmanna a siam angin Kawnpui atangin January 28 chawhnu dar 1.30 khan power an nei thei ta a ni,’ a ti.
Power transformer-ah rokhawlhna awm avanga mipui eng pek theih loh chang a awm thin tih thuchhuah hian sawiin, ‘Kan transformer zinga zaa 72 hi kum 20 aia rei service tawh an ni a. A hlui thlak nan sawrkar chuan ruahmanna a siam mek a ni,’ a ti. Power minister F. Rodingliana hoa thukhawm chuan hetiang thil hi tun hnu ah a thlen tawhlohna tur leh power-a kan intodelh theihnan solar hmanga power siamchhuak thei turin khawtlang hruaitu hrang hrang hnena ram an dil thinnaah hmun remchang awm theite lo ngaihtuahsak turin an ngen tih a sawi bawk.