Peace City – Pathian ruahmanah ngai

Thenzawla Peace City chu Pathian ruahmannaa ni ah an ngai tih Thenzawl khawtlang hruaitute leh political party chuan an sawi.
Thenzawl Joint Village Council huaihawtin NGO leh political party tin aiawh chu Inrinni khan an thukhawm a. Mizoram sawrkarin Thenzawl-a Peace City din tuma a ruahman mek chu sawiho niin lawmawm an ti a, an thlawp tih an sawi. Peace City khuhhawnna pawh Thenzawlah ngei bialtu MLA, chief minister hoa neih nise an ti.
Kalkhawmte chuan, hmun him, Aizawl atanga hla lo, Aizawl khawpui nena tangkawp thei tur khawpui neih belh chu kan state-in a mamawh hle a, Serchhip bialtu MLA, chief minister Pu Lalduhoma’n ram mamawh hria a, Thenzawl ramlai hmuna Peace City din tura hma a la chu an thlawp a; Mizoram ramlai, chhim leh hmar chhak leh thlang mipui tan pawh a panna awlsam taka hmun rem tha tak awm chu Mizo thawnthua ‘Chhurbura vuakzawl’ an lo tih ang kha a ni, tih an sawi.
‘Kum 70 liam ta atang khan Pathian atanga hriatna lo dawng tawhtu Pastor Chhawna leh mihlim Pu Chawngkhupa ten Zofate khawpui tur Thenzawl, tiin an lo au tawh thin a. Peace City lo inmun chho ta zel hian Pathian thil tum chu kan ram hian a tawng chho mek ni ah kan ngai a; kan bialtu MLA-in Peace City din a tuipui hle mai pawh hi ruahmantu Pathian remruat ngeiah kan ngai a, he hmalakna kal chho turah hian Zoram mipui leh Zofa zawng zawng tawiawmna kan ngen a ni,’ an thuchhuak chuan a ti.
Chief minister rawtna lo thlawptu pawimawh tak tak – Prime minister Narendra Modi, Union Home minister Amit Shah, Ministry of Housing & Urban Affairs (MOHUA) in survey hnathawhna atan cheng vaibelchhe 10 a sanction leh Pu K Sapdanga’n a department enkawl, Urban Development & Poverty Alleviation kaltlanga bawhzui tura a umzuinaah lawmthu an sawi tih a sawi bawk.