Pem lut dap beihpui thlakna a buai zel
President Donald Trump-a sorkar chuan an rama dan lova pemte dap chhuah beihpui a thlak mekah Los Angeles khawpuia ni li chhung duh lohna lian tak lantir hmet mit turin sipai a dah luh belh a. Hetih lai hian duh lohna hian khawpui lian dang a kang kai tan mek.
Los Angeles huam chhungah hian US Marines 700 vel leh National Guard sipai tirh luh belh niin 4,000 an tling tawh.
California Governor Gavin Newsom-a chuan hetianga sipai tirh luh hi ‘dictator president-in thil tihkhawlhkham a châkna’ tihpuitlinna niin a sawi.
State sorkar hian president chu governor phalna la lova an state-a sipai dah lut niin an sawi a. US sipaite hi tual chhung dan leh thupek kenkawhnaah hian an inrawlh zen zen lo hle.
Tun hi kum 1965 hnua president-in governor phalna la hmasa lova US khawpuia National Guard sipai a tirh luh lehna hmasa ber a ni.
US Marines erawh chhiatna lian tak, Hurricane Katrina leh 11 September 2001 beihna an tawhte khan tirh luh an ni.
Tun tumah hian Trump-a sorkar hian tual chhunga police hna thawk tura sipai luh theihna dan, Insurrection Act chu a hmang bawk si lo a ni.
Twentynine Palms, California-a 2nd Battalion, 7th Marines sipai 700 rual chu immigration agent-te telin sorkar laipui thil leh mihring venghim turin an lut tih US sipaite chuan an sawi.
Thawhtanni zanah khan LA chuan hnuai lama dan lova an rama lut man khawmte an dah khawmna, federal detention centre tuala mipui pungkhawm za tel hnawh darh nan Los Angeles police officer-te chuan stun grenade leh gas canister an hmang.
National Guard sipaiten America-a khawpui lian ber pahnihna lailia building-ah hian mipui lungawi lo an luh lohna turin an dang vek bawk.
LAPD chuan Thawhtanni chawhnu khan mipui zing atang hian officer-te vawm an awm tih an sawi.
Lungawi lohna hian New York, Philadelphia, Dallas, Austin leh San Francisco telin US khawpui lian dang pakua a kang kai tawh.
LA kawtthlerah hian Zirtawpni khan Immigration & Customs Enforcement (ICE) officer-ten Latino huam chhung an dap atangin lungawi lohna hi lantir tan a ni.
Mipui hian thil an rawk a, mahnia inkhalh thei car-te an hal a, dan kengkawhtute chu lungin an vawm a, kawngpui lian an dang bawk.
LAPD chuan Inrinni zan khan mi 29 an man thu leh Pathianniah mi 21 an man belh tih an sawi.
An mi mante hi Molotov cocktail hmanga mi thah tum leh police officer kutthlak thubuai siamsak an ni.
LAPD hian kartawp chhung khan thelret silaimu 600 chuang hman a ni tih an sawi.
White House chuan Thawhtanni khan Trump-a hian ‘khawpui kang chhe tur’ ven nan National Guard tirh luh a titlu niin a puang.
Republican president hian a sorkarin dan lova an rama lutte a buaipui dan a dodal avangin California governor man tura rawtna chu a thlawp thu a sawi bawk.
Newsom-a erawh chuan Trump-a hi ama thuin a kal lutuk niin a sawi a, an khawpuia sipai a dah lut chu a dem hle.
Thawhtanni khan Governor Newsom-a sorkar chuan Trump-a sorkarin National Guard an tirh luh chungchangah hian dan anga hma lak a tum a. President hian US Danpui leh state ro inrel hranna a bawhchhia niin an sawi.
Pem lut dap beihpui thlakna a buai zel
Get real time updates directly on you device, subscribe now.