Peru laka chak nuamsa Brazil

Peru laka chak nuamsa Brazil
World Cup trophy vawinga la tling awmchhun Brazil chuan Thawhlehni zanah sili faiin Brasilia khawpuia an mikhual Peru an sawp a, South American World Cup qualifiers tir lama an talbuai pherh hrep hnuah a zawnin match hnih an chak tling ta a ni.
Dorival Junior-a team Brazil hi World Cup 2026 qualifying match an khelh hmasa vawingaah vawili tehreng an tlawm a; karliamta Ningani khan Chile ramah comeback entirin 2-1 hnehna an sualchhuak hlawl a, Brasilia khawpuiah point thum bawk an thawkchhuak zui leh a; game 10 an khelh tlin hnuin table-ah palina an luah a, point rukin hmahruaitu Argentina nen an inthlau.
Peru an sawpna goal hnih kha first leh leh second half penalty atanga captain Raphinha chhuihluh ve ve niin, hun tawp hnaih lamah Fulham player Andreas Pereira leh Luiz Henrique-te’n goal khat ve ve an thawh ve bawk.
Karhmasa maiah Chile hnehin Brazil player-te’n an inrintawkna tlahniam tawh tak an do mar tha leh a, Thawhlehni zan inkhelah a tir phat atangin an khel a nung a, ball pawh an chang tam.
Minute 24-naa goal kham chhuihper dawptu Raphinha chuan Peru defender Carlos Zambrano ‘handball’ hrinchhuah penalty atangin minute 38-ah goal hmahruai a chhuihlut er zawk.
Barcelona forward bawk hian second half tir lam minute 54-ah Zambrano laka Savinho penalty hlawhchhuah atangin sihnih faia Brazil hmahruaina goal a khung zui leh.
Substitute Pereira chuan minute 72-ah ‘acrobatic volley’ hmangin Brazil goal thumna mawi zetin a hemlut a; minute hnih hnu lawkah Pereira goal tur siamsaktu Henrique chuan box tlang kilsir atangin Brazil goal lina a thawh zui ve leh ta a ni.
An kawtkaia an point thum thawhchhuah leh nen khelh 10-a point 16 khawl tlingin, an hnuai chiaha pathumna luahtu Uruguay lakah goal difference hmangin an chungnung.
Hnehna an chan hnua Brazilian television Globo-in an kawmnaah Raphinha chuan leirem rap leh tura an game hnuhnung pahniha hnehna sualchhuah kha an mamawh ngawih ngawih tih sawi chungin an chetchhuah hnuhnung pahniha inkhel an thunun leh theih tak avangin kawng dik an zawh chho leh tawh nia a ngaih thu a tarlang tel.
Inkhel dangah tunlaia chetha tak Aston Villa striker Jhon Duran chuan season kal lai inelna hrang hranga a goal sarihna khung chungin Chile lakah sili faiin Colombia a chakpui.
Barranquilla khaw inkhela goal thum dang hi Davinson Sanchez, Liverpool player Luis Diaz leh Bournemouth chhawr lai Luis Sinisterra-te tihluh a ni a; qualifying kal mekah a zawn zatin vawinga ngawt Chile an tlawm tling ta!
2-1-a Venezuela hnehtu Paraguay chuan point 13 nei chungin tabe-ah parukna an luah a, pangana Ecuador nen an point hmuh zat a intluk rualin an hnuai chiaha pasarihna thut mektu Bolivia lakah point khatin an sang.