Pet Shop Boys in Pop Pioneers Award dawng dawn

Pet Shop Boys in Pop Pioneers Award dawng dawn
2024 MTV EMA-ah Pet Shop Boys chu Pop Pioneers Award hlan an ni dawn. MTV EMA hi November ni 10 hian Co-op Live, Manchester, England-ah an sem dawn a, Pet Shop Boys member Neil Tennant leh Chris Lowe te hi Manchester Camerata nen an perform nghal dawn a ni. Manchester Camerata hi 1972-a indin rawh, vawiin thlenga Manchester-a la che chhuak reng thin orchestra an ni.
Pop Pioneers Award hi pop music lama an thawh hlawk avanga dawng tur an ni a, anni hi pop music a thil thar tichhuaktu, style danglam tak nena rawn ding chhuak thei an nih avangin award hi hlan an nih tur thu MTV chuan an puang.
2024-ah hian Pet Shop Boys hla record hmasak berin kum 40 a tling ve chiah a, rimawi khawvela an inhman chhungin Official U.K. Singles chart-ah top 10-a lang thei hla 22 an nei a, chung zinga hla pali chu No.1 a kai a, Billboard Hot 100 chart top 10-a lang thei hla panga neiin, chung zinga pakhat chu No.1 a kai bawk. An hla hit ‘West End Girls’ chu UK leh US-ah No.1 a kai ve ve a, an hla dang “It’s a Sin,” “Always on My Mind” leh “Heart” te chu UK-ah No.1 a kai bawk.
MTV chuan he award semna show-a perform tur pathum an puan belh bawk a, K-pop atangin LE SSERAFIM, musica Mexicana star Peso Pluma leh South African singer Tyla te an ni a, a hmain perform tur an puan tawh zingah Shawn Mendes, Benson Boone, RAYE, Teddy Swims leh laizawn pathum te din The Warning te an tel bawk.
MTV EMA show hi Rita Ora-i’n a host dawn a, ani hian 2017 leh 2022-ah te he show hi a lo host tawh bawk a, MTV EMA tum thum host thei hmasa ber tur a ni.
Kumin MTV EMA nomination-ah Taylor Swift langsar berin, nomination pasarih a nei a, chung zingah chuan best artist, best video, best pop leh biggest fans a tel a, Ariana Grande, Billie Eilish, Carli XCX leh Sabrina Carpenter ten nomination panga theuh neiin, Ayra Starr, Beyonce, Kendrick Lamar, LISA, Chappell Roan leh Tyla ten nomination pathum theuh an nei bawk.