PHC pathum harsatna sukiang thuai turin sawrkar ka ngensak – Dr R Lalthangliana

PHC pathum harsatna sukiang
thuai turin sawrkar ka ngensak
– Dr R Lalthangliana
Phuldungsei, Marpara leh West Phaileng Primary Health Centre harsatna chu ZPM sawrkarin a rang thei ang bera a ngaihsak a phut tih MNF senior vice president Dr R Lalthangliana chuan a sawi.
Dampa bial by election-a MNF candidate Dr R Lalthangliana hian Thawhtannia Phuldungsei PHC a tlawhnaah IV grade pawh an awm lo tih a hmuh thu sawiin, thawktute an indaih lo hle a, khawtlang mipui an buai hle tih a sawi. Marpara leh West Phaileng PHC a tlawhnaah pawh thawktu indaih loh avanga an manganna leh thawktute harsatna tawh hrang hrang a takin a hmuhpui tih a sawi a ni.
“Phuldungsei PHC building hi Health minister a nih laia cheng nuai 277 senga tha taka sak zawh a ni tih Dr R Lalthangliana hian sawiin, “Dampa bial hi Mamit district chhunga awm a nih angin, thlan tlin ka nih chuan bial chhung khaw hrang hranga PHC leh Sub-Centre pawh Aspirational District a nihna hmang tangkaiin, hriselna lamah hmasawnna a awm theihnan leh staff indaih lohna avanga bial mipuiin harsatna an tawh thin sukiang turin theihtawp chhuah ka tum a ni,” a ti.