PHC tinah doctor kan dah – Health minister

Mizoram sawrkar hnuaia primary health centre tinah doctor dah an ni tawh a, specialist doctor 5 an la thar bawk tih Health & Family Welfare minister Lalrinpuii chuan a sawi.
Siaha-a Independence Day lawm hmanpuitu Health minister chuan, mipui health care avangin nurse 300 an lak thar bakah thawktu hrang hrang 64 an lak belh a, tunhnai maiah specialist doctor 5 lakbelh an ni tih a sawi.
Thingtlang mipui harsatna hriatpuiin ZMC&H a doctor zirchhuakte chu PHC hrang hranga thawk turin an la thar a, PHC tinah doctor dah an ni tawh tih a sawi.
“Thawktu indaihlohna nasa em em chu semrualin, a theih chin chinah thawktu awm tamna khua atanga health worker-te lachhuakin, thawktu awm miahlohna sub centre/ health clinic-ah sem rual an ni. Tunah hian health worker 100 lak belh turin dilna hun hawn mek a ni a. Thingtlang mipui tan sawrkar chuan theihtawp a chhuah reng a ni,” a ti.