Pisa kai hunah pisa kai lo tam

Pisa kai hunah pisa kai lo tam
Mizoram Journalists’ Association Mamit District chuan December 9 – Thawhtanni khan Mamita sawrkar pisa engemawzat an tlawhkual a, chawhma dar 9.30 atanga dar 10.00 thlengin office engemawzatah chuan dawr tur mumal an awm lo deuh vek a, office thenkhatah phei chuan pisa kai an la awm lo tih sawi a ni.
Mamit district khaw hrang atanga Mamita sawrkar office dawr turten kar tir leh kar tawpah officer dawr tur an awm loh thu an sawi thin avangin MJA Mamit District hian thil awmdan bawhzuiin Thawhtanni khan sawrkar pisa ‘surprise visit’ an nei a. Office hrang hrang la tlawh chhunzawm zel an tum tih an sawi.
Office tan hun, chawhma dar 9.30 atanga dar 10.00 thlengin office engemawzat an kal chinah officer biak tur an awm lo deuh vek a. Office thenkhat phei chu staff takngial pawh la kal lo, chowkidar-in office a hawn ringawt an awm nual tih sawi a ni.
MJA chuan Mamit khawpuia office an tlawhkual zingah Kai apps (GOM) hmangtute chuan pisa an kai hma deuh a, mah se, head of office erawh pisa kai an awm lo thung tih an sawi a ni. HoD zinga thenkhat hian Aizawl leh hmundangah Pathianni hmangin an kal thin a. Thawhtanniah office dawr leh training chhuanlamin an cham khawmuang tlangpui thin nia sawi a ni bawk.