Pitar kum 70 miin phir hring!

Pitar kum 70 miin phir hring!
Uganda-ah pitar 70 miin IVF treatment hmangin phir a hring niin damdawiinin an sawi. He pitar hi Safina Namukwaya-i niin, an khawpui Kampala-ah a nau neih hi zai chhuah niin mipa leh hmeichhia a nei a ni.
Damdawi in chuan Namukwaya-i hi nau hring upa ber zinga mi a nih thu leh ‘thil mak’ a nih thu tual chhung chanchinbu hnenah an tar lang. Damdawi in hian an lawmpui thu an sawi a, ‘damdawi thiamna piah lamah mihringin chakna leh tumna a neih vang a ni’ tiin an sawi. Kum 2019 khan Indian pitar kum 73 mi chuan IVF treatment hmang tho hian phir a lo nei tawh bawk.
Namukwaya-i hian Uganda-a Daily Monitor chanchinbu hnenah phir a pai nia an inhriat atangin a kawppuiin a then avangin atan nau pai a hahthlak bik hle tih a sawi a. “Mipate hian pakhat aia tam pawm hi an duh lo tih an sawi tawh thin a. Chuta tang chuan ka pawm ve mai a, amah pawh a lo inlan ngai tawh lo,” a ti.
Fa neih a châk em em thin tih a sawi a. “Mi fate ka awm thin a, an lian a, min kalsan zel a. Ka upat hunah tunge min enkawl ta ang tih pawh ka inzawt thin,” tiin a sawi. Nau a neih theih dan hi miin chi an pe nge a that laiin a chi a lo dah tha a, chu chu a hmang tih hriat a ni lo thung.
Hmeichhia hi a tlangpuiin kum 45 leh 55 inkarah an thi a hul tlangpui a. Hemi hnu lamah hi chuan nau pai theihna a tlem tawh em em a, damdawi thiamna hmang erawh chuan tlemin a tihpun theih ve bawk.
In-vitro fertilisation (IVF) hi hetianga nau inpai chawptir theih dan zinga mi a ni a. Hmeichhe chi hi an chhul atanga la chhuakin laboratory-ah an chawm puitling thin a ni. Naute atana insiam thei tura an chawm puitlin hnu hi embryo an ti a, chu chu nu pumah dah lehin nuin a hrin turin a chawm veleh thin a ni.