Plastic hnawm chhar paha kea kalin a tum ram a thleng ta

Lailapur atanga Siaha district-a Mizoram ramri tawp thleng kea kal a, plastic hnawm chhar pahtu Vanlallawmzuala Varte chuan a tum ram a thleng ta. Kumin May 26 khan Lailapur atangin Vanlallawmzuala Varte (33) s/o VL Chhuanawma, Mission Veng hian a kawng zawh tanin ke in a kal a, veivakten kawngkama an paih mai mai plastic um a chharkhawm nghal zel a ni. A thianpa H Lalhruaizela s/o Lalchhuanawma, Sairang chuan lirtheiin a zui ve zel a. June 23 chawhnu dar 1.50 khan a tum ram, Khaikhy khua, Siaha district a thleng.
Ni 18, darkar 13 leh minute 50 a kal a, a vaiin km. 623 a kal, pen 747600 a pen hman. An thlen tawpah a tul dan azirin chaw pawh an insiam chawp mai zel a. Kawng lakah amah zuitu a thianpa lirthei (Santro car) chhiat avangin ni 5 vel an tangkhang tih loh chu harsatna tawh em em an nei lo niin Vanlallawmzuala hian The Aizawl Post a hrilh. Car chhiat chhan zingah hian perek lam chi an rah fuh avanga a ke puncture vangte a ni a, hetiang lam hi chhar tel nghalin, perek lam chi thir zum 100 vel a chhar hman a ni.
Plastic um hi a vaiin 6500 vel a chhar tih sawiin, khawtina bawlhhlawh paihna tur hmun an siamah an paih zel a. Lungleiah UD&PA department-in lo hmuakin an thil chharkhawm sa hi an lo lakchhawn sak. Lawngtlaiah LADC LAD-in lo hmuakin Downtown School Scouts & Guides nen plastic um an chhar ho a. Siaha ah chief medical officer leh MADC-a Sanitation Committee ten lo hmuakin, inkaichhawn theih loh natna chungchanga hriat tur tul sawina atan hman a nih bakah a hnawm chharkhawmte an lo laksak.
A thianpa car hian a hnawm chhar hi a phurh len loh tum a awm thin a, an duh anga tam an chharkhawm thei lo zawk tih Vanlallawmzuala hian a sawi.
Plastic um paih an chhar bakah hian non-communicable disease a tlem theihna’n kea kal tam a pawimawh tih chu a tarlan tum pakhat a ni.
Maxi cab service leh bus kawngkharah te ‘bawlhhlawh paih suh’ tih tar bakah bawlhhlawh bawm inchhawp zel theih nise, tih chu a duhthusam zingah a tel a. Khualzin veivakte bawlhhlawh paih kawngah fimkhur zual turin a chah bawk.
A thil tum a tihhlawhtlin theihna tur hian a mamawh ang ngaihtuah sak a, sponsor-tu a nei a. Mizoram State Sports Council, UD&PA department hnuaia Swachh Bharat Mission (Urban), National Health Mission, Aizawl South-II bialtu MLA Lalchhuanthanga
NHM state nodal officer Dr Lalchhuanawma, CLS Academy leh 7.KIM TEA (Biate) te an ni.
Zirtawpni vek khan Aizawl panin an thiandun hian an rawn haw lehnghal a, ruahman ang chuan Thawhtanni tlaiah Aizawl thlen theih an inbeisei. Mission Veng Local Council leh YMA tangdun chuan amah hmuahna buatsaih an tum nia thu dawn a ni.