Play-off lamah pawh Real leh Benfica bawk!
Play-off lamah pawh Real leh Benfica bawk!
Champions League round of 16 lut tur team pariat an chian tawh laiin team 16-te chuan play-off kaltlangin knock out round hmasabera hmun ruak dang la awm pariat hi an inchuh dawn a, nimina intum tur an tihfel takah Nilainia inhmachhawn tawh Real Madrid leh Bernfica bawk an intawng nawn leh sak dawn!
Jose Mourinho team Benfica hian tunkar laihawl khan Lisbon khawpuia an mikhual Spanish giants chu 4-2-in an barakhaih a; Mourinho club hlui Real hi table-a a sang pariat zingah an tel pha lo chiah a, pakuana ni chungin automatic-a last 16 luh theihna hun remchang an bawhpelh a, an kawng daltu Portuguese club ngei mai nen an insu nawn leh dawn a, tlawm nawn an tum tawh lo khawpin a rinawm!
Nilaini inkhelah khan hun pekbelh minute riatna a kal mek laiin Benfica goalkeeper Anatoliy Trubin chuan chiang lehzual zawka Bernabeu club tlawmna goal a khung a, play-off an khelh hunah hian kha goal-veng laka goal thun kha Real tlarhma luahtute chuan an chak zek zek tura ngaih a ni!
11-na luaha league phase kaltlanga inhlangkai zo bik lo team hraw dang defending champion Paris St-Germain chuan play-off dangah Ligue 1 lama an elpui lian Monaco an su ve bawk ang.
12-na Newcastle United chuan Qarabag an tum dawn a; Azerbaijan champion Qarabag hian vawi thum hnehna nen table-ah 22-na an luah pha a, league stage-ah khan draw vawi khat neiin, tum li an tlawm thung.
An league phase match hnuhnungberah khan Anfield-ah Liverpool chuan si ruk fai tehrengin an sawp a; tunhma lama Premier League team nen vawi kua an intum tawhah Ajerbaijan lub hian hnehna an la chang ngai lo a, Magpies lakah pawh hian rinkai zawk an ni lo!
English club laka tlawm an pumpelh hmasakber tum chu nikum November thlaa Chelsea nen 2-2-a an inhnehtawh nawlh kha a ni.
Newcastle leh Qarabag inkhela chak zawk zawk hian last 16 lamah Chelsea ermaw Barcelona emaw a khawi emaw zawk zawk an hmachhawn ang.
Season kal laiah hian English team panga ngawtin league phase-a top eight luah chungin last 16 hi automatic-in an lut a, Newcaslte an tlang ve leh chuan knock out round-ah Premier League club paruk ngawt hmuh tur an awm dawn!
English top flight club pangate chu Arsenal, Chelsea, Liverpool, Manchester City leh Tottenham Hotspurs-te an ni.
Tarlan tawh thin angin, league phase khelh zawh taka pakuana atanga 24 luahtute zawng khan February ni 17-18 chhung hian two-legged play-off hmabak an neih meka an game hmasa zawk an khel theuh ang a, chawlhkar khat hnuah return leg an tkhel leh diat diat dawn a ni.
Kumin (2025-26) Champions League final match hi May ni 30 khian Hungary khawpui Budapest-a Puskas Arena-in a thleng dawn a ni.
Play-off an han khel zo ang a, last 16, quarter-final, semi-final leh final draw chu February ni 27 atan dah a ni.
Uefa Champions League
play-offs draw
Bodo/Glimt v Inter Milan
Benfica v Real Madrid
Monaco v Paris St-Germain
Qarabag v Newcastle
Galatasaray v Juventus
Club Brugge v Atletico Madrid
Borussia Dortmund v Atalanta
Olympiacos v Bayer Leverkusen
Knockout phase fixture dates
Last 16: 10-11 and 17-18 March
Quarter-finals: 7-8 and 14-15 April
Semi-finals: 28-29 April and 5-6 May
Final: 30 May