Dal theih loh Alcaraz

Australian Open-ah a vawi khat nan champion tuma tan khawh Carlos Alcaraz chu hliam leh Alexander Zverev pawhin an dang thei lova, darkar nga leh minute 27 chhung zet fiahna hautak a hmachhawn hnuin dal rual loha hnehna changin final a lut a, Career Grand Slam a hnaih deuh deuh zel.
Australian Open-a final la lut ngai lo Carlos Alcaraz hian semi-final-ah 2025-a finalist Alexander Zverev a hmachhawn. Tunhnaia a hneh theih tak Zverev lakah bul a tan tha a, game li hloh chungin set khatna a la. Set hnihnaah bul a tan tha lova, 5-3 a hnufual zawk a nih vangin set hloh ngei tura ngaih a ni hman. Set lak theihna hun remchang a neih laii Zverev a chesual a, tie-break khelh a ngai. Tie-break-ah Alcaraz a chungnung zui leh a, set a lak belh.
Set hnih a la zawn a, set thumnaah pawh bul a tan that laiin hliamin a tlakbuak a, ngai a awh lo hle. Hliamin a tihbuai vangin a khingpuiin set hnih a lak ve theih phah. Set hnih a lak zawn hnuin Zverev a chak teuh hle a, deciding set-ah 5-4 in hma a hruai. A serve hum se chak a, final lut mai tur a nih laiin a che nawi zui leh a, a serve a hum zo lo. A khingpui hnual leh talbuai laiin Alcaraz erawh phur leh inringtawk zetin a inlan thung. Alcaraz hian pui zetin game thum a la zawn ta mai a. Zverev lakah hian 6-4 7-6 (7-5) 6-7 (3-7) 6-7 (4-7) 7-5 in hnehna a chang a, a phu ang ngeiin Australian Open final a lut zui ta a ni.