PLRS LEH ZORAM THAR Rev. Dr. Zaichhawna Hlawndo

Kum 2023 inthlanpui lai khan Chaltlâng kawngpui sirah thu ziak kan târ a. Chu chu ‘PARTY SAWRKAR KAN DUH TAWH LO, PATHIAN LAL RAM SAWRKAR I DIN ANG U’ tih a ni. PLRS lam pum chu ‘Pathian Lal Ram Sawrkar’ tihna a ni. Ka mumang mai mah nise a taka lo thleng ngei tura kan beisei, kan nghahhlelh êm êm a nih avângin ka sawi lang duh a. Kan ramah hian inthlanpui a lo awm dâwn a, party pakhat candidate hian khawlaiah thu a lo sawi lauh lauh a. An party thiltum thatzia te, an thlan tlin chuan mipuite tana an thiltih tumte a lo sawi a. Mipuite chuan flag var hi an lo keng fur mai a, flag vai pahin ‘Party Sawrkâr kan duh tawh lo, Zoram Thar kan din dâwn! tiin an lo au rual dûal dûal a. Party candidate chu thusawi thei miahlovin an lo siam a. Chu mumang chuan min ti hlim hle. Mipui aututen an au hla ang taka a lo thlen huna an hlim tur zia leh kan ram nawm tur ziate min ngaihtuah tir.
Zofate chu India, Bangladesh leh Burma milembiate Sawrkârna hnuaiah kan awm mêk a. Chung Sawrkâr chu Democracy leh sipaiin tihluihna hmanga an siam te an ni. Khawvel puma sawrkârna zawng zawng hi mihringte lal leh thuneihna deuh vek an ni. Democracy hmanga sawrkârna siamte hi Bible a kan buan te leh kan hmelma a tih ang hian an kal deuh vek a ni. Ephesi 6:12 ah chuan ‘Kan buante hi tisa leh thisen an ni si lo, lalnate leh, thuneihnate leh, he thim chunga khawvêl rorêltute leh, vân hmunahte thlarau sualho awmte an ni zâwk e’ tih kan hmu. Khawvel hi diklo taka lal leh thuneih in chuhna hmanga sawrkâr siam hnuaiah a kûn vek tih mai tur a ni. Pathian lalna ram, Pathian duh dan anga rorelna PLRS hi khawi ramah mah a la awm tak tak lo a ni ber mai.
PLRS chu a taka leia lo ding tur a ni em? tih hi zawhna pakhatna chu a ni. Zofa ringtute zinga mi tam takin hei hi chu a taka ding tur a ni lo tih tanchhan nan kan Lalpa Isua Krista thusawi tlawh chhana an hman chu Johana 18:36 – Isuan, “Ka ram chu he khawvêla mi hi a ni lo; ka ram chu he khawvêla mi hi ni sela, ka thuihruaiten an bei ang, Juda-te hnêna pêka ka awm loh nân; nimahsela, ka ram zawng heta mi hi a ni lo,” a ti a, a chhâng a. Heta Isuan ‘Ka ram chu he khawvela mi hi a ni lo, a tih hi English chuan ‘My kingdom is not of this world’ tih a ni a. A awmzia chu Isua Krista lalna chu khawvel lal ram ang a ni lo a tihna a ni. Isuan khawvelah hian lal ka tum lo a tihna a ni lo. Khawvela lalna leh thuneihna hi a ta a ni tih chiang takin Mathaia 28: 18 ah khan a sawi ‘ Lei leh vana thuneihna zawng zawng ka hnenah pek a ni ta’ tiin. Pilatan “Chu lal I ni elo? ti a zawhna a chhanna ah pawh khan lal a nih thu leh chu chu khawvela a lo kal chhan a nih thuin a chhang (Johana 18: 37). Pathianin lei thar a din dawn a, Setana lalna leh thuneihna zâwng zâwng hi ala ti tawp vek dawn a ni tih hi Bible ah pawh hmuh tur a awm ( Thupuan 17:14, 19:16). Chuvang chuan Pathian hian leiah a lal ram sawrkar PLRS hi din a tum a ni tih chiang takin kan hmu.
PLRS chu engtin nge a din theih ang? tih kha zawhna pahnihna chu a ni. Kum 2012 a Lalpa kohna chiang tak, i pianna ramah kir tawh rawh Zoram Thar ka din dawn ! tih thu ka dawn khan he a lal ram sawrkâr a din dan tur hi min hriattir a. Chu a lal ram sawrkâr atan chuan Zofate ringtute zingah a chhiahhlawh tur, amah tihmi, ama thu thu a awm tur, a sawrkarna dawhkana thu tur i zawng ang tih thu ka dawng tel bawk. Kan rama rorêlna a bawlhhlawhna chhan chu milembiate tih dana party politics bawlhhlawh tak hmanga sawrkârna kan siam vang a ni. Pathian lalna tur ngaihtuah miah lova mihring lal kan tum vang a nih thute fiah takin min hriattir bawk. Chu thu ka dawn atang chuan Zofate zinga Lalpa tihmi, a lalna chauh buaipui duh tur Lalpa chhiahhlawh hna thawk tura a hriakthih ngei ni a ka hriatte pawh chu ka ngaihtuah a, ka thu dawn te pawh ziakin ka thawn ta a ni.
PLRS chu engtikah nge a lo din ang? tih kha zawhna pathumna chu a ni. Ka pianna rama missionary hna thawk tawh tura kohna ka dawn kum kha 2012 a ni a, kum 2013 inthlanah te khan a ni nghal tawh mai angem tihte pawh ka ngaihtuah a ni. Pathian aw chiang taka kan hriat hian a taka thleng nghal mai tur emaw, ding nghal mai tur emaw tih hi a awl khawp mai. Thuthlung hlui leh thara Pathian mite pawh khan an thu dawn leh hriatte pawh thleng nghal mai tur emaw an tihte pawh hmuh tur a awm. Kohna ka dawn atang khan thil dang engmah hi ka ngaihtuah tak tak thei tawh lo. Kum 3 chhung kha in buatsaih nan ka hmang a, kum 2016 khan puanthuah telin ka lo hawng ta a ni. Chuta tang chuan PLRS thu chu Zoram dung leh vangah ka au ta char char a. Pathian tihmi te pawh chu ka sawm khawm a, theih ang leh thiam ang tawkin hma kan la ta a ni.
Kum 2018 inthlanpui ah Zoram Thar atangin mi 18 te chuan Pathian kohna dawngin bial 23 ah Lal ber Lal Isua Krista lal ram atan thuthlung bâwm ZUNGBUN kan hung. Party politics ban san a, Pathian lal ram leh a felna zawng hmasa tawh a, a lal ram tana vote thlak turin mipuite sawmin rim takin kan thawk. Kum 2023 ah pawh Zoram Thar atangin mi 18 bawk Lalpa Chhiahhlawh Intelkhawm Lalpan min pe leh a, chung mite chuan bial 21 ah Lalpa thuthlung bawm ZUNGBUN kan hung leh a ni. Kan ramah PLRS Lalpan min din sak a tum thu te kan au a, bial chhungah theih angin khawlaiah te auvin inah te lutin tawngtaina te kan hmang. PLRS dinna atan kum 10 chhung chi chu kan tuh a, tunah chuan tha taka tovin a lo thang lian zelin Zofate khawvel pawh a lo deng chhuak tan ta a ni. Pathian lal ram lo thlen hi a hnai tawh tak zet a, Zofaten milembe party politics kan ban san fel hunah amah Pathianin kan tan a lo ruat lawk angin PLRS chu a lo ding tawh dawn a ni. Party sawrkar kan duh tawh lo, Pathian Lal Ram Sawrkar kan din dawn kan tih vek hun hi dingdihlipin kan nghak mek a ni.