PLRS LEH ZU

Rev. Dr. Zaichhâwna Hlâwndo

Zu hian Zofate chauh ni lo, khawvêl hi a chawk buai tawh a, a chawk buai mêk a, a la chawk buai zêl dawn! Zu chu eng nge tih chuan dawidim emaw chawl hmanga thil ei chi up a, tui in theiha lo insiam kha Zu kan tih chu a ni. Zofate hian zu chi hrang hrang- Zupui, Rakzu leh Zufâng te kan siam thin a, tun hnaiah grape Zu te kan siam bawk. Sap kan tih mai khawthlang lam mite khuan dawidim hmanga siam zu chi hrang hrang pawh an ngah hle.
Zu chungchangah hian sawi tur tam tak a awm a, ziaktute pawhin an ziak kûr ngiai ngûai tawh a. Tun tumah chuan PLRS leh Zu tih chungchang kan sawi dawn a ni. Zu in leh zu ruih kan chin vangin mimal nun, chhungkaw nun, khawtlang, ram leh hnam kan rûm a ni tih chu tu man kan hai lo. Hei hi eng vang nge kan tih chuan zu in duh leh rui duh kan tam em vang a ni tih hi a chhanna awlsam tak chu a ni. Engvanginnge zu in duh leh rui duh kan tam tih zawhna chhanna chu Pathian thu kan awih loh vang leh a tel lova hlimna dang kan zawn vang a ni. A tawi zawngin, Pathian Lal Ram kan nunah a thlen loh vang a ni tih hi ka chhanna chu a ni.
Heti tak maia Zuin Zofate min sûat nasat avang leh setanan zu hmanga min tih chhiat nasat avangin ram leh hnam pumin kan buai a, kan buaipui lo thei lo a ni. Sawrkâr roreltute leh Kohhran pawhin hei leh chen hi kan buaipui tawh a, kan buaipui mêk bawk. Mahse rem lam aiin a pung tual tual a, Zofate min suat zel a ni ber mai. Engtin nge he Zu avanga buaina hi a lo reh ang tih hi kan buaina ber chu a ni.
Kan ram hruaitu MLA thenkhatte chuan zu hi thlah zalen a, zu in dan thiam kan inzirtir a ngai te an ti. |halaite khawvel kan ti chep lutuk a, zalen taka zu zawrh hi kan thatpui zawkin an ring. Kan mangang tlang a, a tih ngaihna kan hre lova, kan thahnemngaihna luang liamah ka ngai. Amaherawhchu zu thlah zalen avanga in thiam leh thatpui emaw changkanpui ram leh hnam ka la hmu lo. Vai ramah kum 10 chuang kan awm a, zu in thiam leh rui thiam aiin zu in avanga chhungkaw buai ka hmu tam. Sap ramah kum 10 chuang ka awm a, zu in thiam te chu an awm teh meuh mai. Mahse rui thiam erawh an vang. Zu avanga buaina, insualna, thihna leh tualthahna te a tam hle. Mizoram atanga sap rama awm, zalen taka zu in thlarau nun tluchhe ta ka hre nual.
Kan buaina hi zu a ni lova a in duh leh zu ruih duhna thinlung dik lo (moral corruption) kan tam vang a ni. In duh leh rui duh awm lo ila zu hi buaipui a ngai lovang. Zu in leh zu ruih duhna hi Pathian atanga chhuak a ni lova bumtu, tihlumtu setana hnathawh dik tak a ni. Kan ram rorelna ah Isua Krista a lal rih loh vang a ni. Zu in sawimawina te hi Pathian atanga chhuak a nih ka ring lo. Zu in duh zawng zawng hian an in duh chhan chu pangngai lo deuh (normal loh), tlema han hai ve deuh an duh vang a ni berin ka hria. Theitui leh in tur dang tui tak tak awm laia dawidim pawlh kher in duhna chhan hi thil dang tehchiam awm vang niin ka hre lo.
Ka nunah Pathian lal ram a thlen ve tawh avang in zu hi ka kaah a lût tawh tur a ni lo tih ka thinlung phekah ziahin a awm. Sap rama ka awm lai pawhin zu changkang tih vel hian ka thinlungah hmun a chang lo. Thlawhtheihnaah zu aiin theitui tui tak in ka thlang zawk thin. Zu ka in ve thin lai pawh khan ruih duh vangin ka in a, tui ti takin ka in ka hre lo, a tui loh em avang khan rui khawpa in tur chuan a hmeh tur ei tel a ngai thin.
Zofate nunah Pathian lal ram a thlen a, Pathian Lal Ram Sawrkar (PLRS) a din hunah chuan zu vanga kan buaina hi a bo tawh ang. Assembly House-ah pawh zu chungchang ni lovin buaipui tur dik tak “A lal ram leh a felna” kan dah pawimawh tawh dawn a. Zu ni lovin Pathian Lal Ram Chanchintha hril kan buaipui tawh zawk dawn a ni. Chu hun chu kan hma lawkah hian chhawpin a awm tih hriain beidawng lovin hma lam i pan zel ang u.