PM KISAN dawngtu Mizoram atangin nuai chuang an awm

Kuthnathawktute dawmkanna atana sawrkar laipui scheme ruahman, PM KISAN chhawrtu tur mi vaibelchhe 10 chuang hnenah Inrinni khan an bank account ah sumfai sem chhuah a ni a. Mizoram atang pawhin mi nuai chuangin dawngin, kum khatah Rs.6000 theuh an dawng dawn.
Prime minister Narendra Modi ruahman kuthnathawktute tuamhlawmna scheme pui ber, PM KISAN hnuaia a chhawrtu sum dawng thei tura state tina a buaipuitu department hmalakna chu a takah chantirin, Washim Maharastra atangin direct benefit transfer-in India rama kuthnathawktu vaibelchhe 10 chuang hnenah sem chhuah a ni.
He scheme hi kum 2019 atanga bul tan niin, tunah hian Agriculture department hmalaka kalpui chhunawm zel a ni. Khawvela kuthnathawktute hamthatna tur DBT hmang ‘digital marvel’ lian ber a ni a. He scheme-a inziaklutte chuan thla 4 danah Rs. 2000 theuhin kum khatah Rs. 6000 an account-ah DBT hmangin an dawng dawn a ni.
Mizorama kuthnathawktute mi 110279 hnenah a vaiin cheng vaibelchhe 31.6782 sem chhuah a ni. Hei hi kumin chhunga 2nd instalment a ni.
Tunah hian kuthnathawktute chanchin hriat tur kim chhuichhuah theih loh leh chinfel ngai leh paih ngai tam tak hmuhchhuah mek a ni a. Dawng tlak ngei, la inziaklut lo tan inziahluh theih reng a la ni.