Tesla chief executive Elon Musk chuan India Prime Minister Narendra Modi chuan India rama ‘investment liantham’ ti turin a ngen tia sawiin, chutianga tih ngei chu an tum thu leh puanchhuahna an neih vat tur thu a sawi zui nghal.
Musk hi June 20 khan Modi nen US ah an inhmu a, Musk hian Modi hnenah hian India rama manufacturing base din an tum dan a hrilh nia sawi a ni.
India hian sustainable energy lamah theihna sang tak neiin chung zingah chuan solar power, stationary battery pack leh electric vehicles te pawh a tel tiin Musk chuan sawiin, SpaceX’s Starlink satellite internet service pawh India ramah an kalpui theih a beisei thu a sawi bawk.
“Modi hian India a ngaihtuah takzet a, a chhan chu India rama investment lian tham ti turin min tur a, keini pawhin tihngei kan tum a ni” tiin Musk chuan a sawi.
External Affairs Ministry pawhin thuchhuah siamin Modi chuan electric vehicle siamtute chu India rama electric mobility leh commercial space sector luhchilh turin a ngen tiin an sawi bawk a.
Musk chuan, Tesla te India ramah mihringin a titheiha a rang thei ang berin inbun kan tum ang” tiin a sawi a. Musk chuan Modi ‘fan’ a nih thu sawi bawkin, nakumah India ram tlawh a tum thu a sawi bawk a.
“Elon Musk nen kan inhmu a, energy atanga spirituality thlengin titi dunna kan nei a ni” tiin Modi chuan a tweet zui bawk.
Thla kalta khan Tesla executive rual te chuan India tlawh tawhin Indian bureaucrats leh minister te nen titihona leh inbiakna te neiin, India ramah an car leh battery dinna hmun turte an thlithlai tia sawi a ni a.
Thla kalta khan Musk chuan Tesla te chuan kumin kum tawp hma in factory thar dinna hmun tur an thlang fel hman tawh ang ti bawkin India chu hmalak zelna tura hmun duhawm tiin a sawi bawk.
US company te hian Washington leh Beijing inbakaih zelna kalzelah China a manufacturing base an neihah an inghat bur thei tawh lo a, hei vang hian India melh bawkin nikum khan erawh India luh a tumna chu tax structure dang lutuk avangin an chhunzawm rih lo thung a ni.
Modi leh Musk inhmuh hma lawk hian Twitter neitu hmasa Jack Dorsey chuan India chu kum 2020-21 a lungawilohna lantir laia Twitter tihtawp tumah a puh thung a, hei hi India chuan chhang letin ‘dawt muhlum’ a tihsak thung.
“Twitter in duhthlan tur dang a nei lo, local government thuawih a ni mai. Local government law te kan zawm lo a nih chuan shut down kan ni mai” tiin Musk chuan June 20 khan a sawi ve hlauh thung.
PM Modi hian June 21-24 chhungin US President Joe Biden leh First Lady Jill Biden sawmna in US a tlawh a, US a cham chhung hian Nobel laureates, economists, artists, scientists, scholars, entrepreneurs, academicians leh health sector expert te a hmu dawn a ni.
Musk bakah hian PM Modi chuan astrophysicist leh author Neil deGrasse Tyson, Nobel laureate economist Paul Romer, author Nicholas Nassim Taleb leh investor Ray Dalio te pawh a hmu dawn a ni.
-- Advertisement --
Eng nge harsatna?
Kum 2019 atang tawh khan Tesla Motors te hian India luh an tum tawh a, an luh theihloh chhan ber chu electric vehicles a import duty sang lutuk vang a ni. Indian tax slabs ah electric vehicles $40,000 man chin chuan import tax 60% an pek a ngai a, $40,000 hnuailam chuan 100% lawih an pek a ngai.
Tesla car man tlawm ber hi $45,000 vel niin, chu chu Indian pawisa chuan Rs 37 lakh vel a ni a, import duty 100% pek a ngaih bawk si chuan a to lutuk dawna hralh ngaihna awm dawn lovin a lang a ni.
Centre dinna?
Make in India aupuitu Narendra Modi sorkar chuan Tesla te chuan India ramah an car siam chhuak se an ti a. Kumin kumtir lam khan Road Transport and highways Minister Nitin Gadkari chuan Tesla te chuan India ramah manufacturing plant an duh chuan an din thei a ti a. “Car siamtute hi subsidy leh discount hrang hrang kan pe thei a, mahse, car te chu India rama siamchhuah an ni tur a ni a, China a siam heta rawn phurh a ni tur a ni lo” tiin a sawi.
Tesla te hian a tirah chuan factory din hmain vehicle te chu chawkluh phawt an duh nia sawi a ni a, Tesla te hi state thenkhatte chuan an state a inbun turin an sawm nia sawi a ni a. Tesla te India an luhtheih lohna chhan ber chu import duty sang lutuk te, Centre in Make in India a phut luih vang te chu a ni bera ngaih a ni.
Hmalam panna
Thla kalta khan Elon Musk chuan Tesla te chuan kumin kum tawp hmain an manufacturing tihna hmun tur an thlang fel hman ang a ti tawh a. The Wall Street Journal tena an kawmnaah pawh chuti lam hawi chuang sawiin a hnu lawkah Tesla team te chuan Delhi lutin officials te nena inbiakna an nei zui bawk.
Chumi hnu lawkah Union Minister Rajeev Chandrashekhar chuan Tesla te chuan India ramah production leh innovation base din an duh tiin a sawi a. India sorkar in puih theihna kawnga puih a duh thu pawh kan hrilh a ni tiin a sawi.
Tesla ten chet lak vat mamawh
Elon Musk an kum 2030 atanga electric vehicles kum khata 20 million zel siamchhuah target a siam tihlawhtling tur chuan Tesla ten chet lak vat an mamawh a. A hma chuan kum khatah vehicles 1.3 million siamchhuah target neiin hei hi nasa taka tihsan a ni a. Chutihlai chuan competitor dang Mercedes, BMW leh Volkswagen te chuan Electric Vehicles intlansiakna lamah chet an la nasa hle bawk.
Tesla te hian tun dinhmunah manufacturing plant paruk nei mekin chung zinga pali chu US ah a awm a. A dang pahnih te chu Shanghai leh Berlin ah an awm a, tunah Mexico ah Gigafactory din tumin hma an la mek bawk.
Tesla te phut, India tana chona
Tesla vehicles te hi aerodynamics minimalist design leh high-end features heng Autopilot te ang a neih avangin danglam leh changkang em em a ni a.
India ramah sorkar in clean energy lama hmalakna a kalpui nasat avangin electric vehicles lam a lar zual zel a. Tun dinhmunah chuan he sector lama langsar ber chu Tata Motors te niin electric vehicles mipui nawlpui lei theih turin Rs 20 lakh hnuai lama siamchhuah tumin hma an la mek.
India chu thil manin awmze thuk tak a neihna a nih avangin Tesla te hian customer te tihlim tho si leh an lei phak turin engtiangin nge hma an lak ang tih chu zawhna pawimawh tak a ni.