Assam-ah tuilian nasa

Assam-ah tuilian a nasa hle a, ruahsur nasa vanga tuilian hian mi 34,000 vel zette chu a khawih buai hle a, tuilian hian Assam a district pakua lai a khawih buai niin official te chuan an sawi.
Bhutan sorkar leh India Meteorological Department te chuan ruahsur nasa a la thleng dawn niin an sawi a, hei vang hian Brahmaputra leh a fintu lui te chuan len lam an la pan tura ngaih a ni.
Assam State Disaster Management Authority (ASDMA) chuan thuchhuah a siamah Royal Government of Bhutan chuan an ramah ni 2-3 chhung chu ruahsur nasa a la awm dawn tia an tarlan thu sawiin hei vang hian Bhrahmaputra leh a fintu lui te chuan len lam a la pan thei a ti a.
Hei bakah hian Bhutan bakah Assam a upper ctachment area lamah ruahsur nasa thleng zel vang hian Bhutan atanga Kurichhu Dam atanga tui chhuah chuan Assam-ah tuilian a thlen nasa a ti bawk.
India Meteorological Department pawhin ‘Red Alert’ tichhuakin ni eng emawti chhung chu ruahsur nasa tak la thleng zui thei a ti bawk.
IMD’s Regional Meteorological Centre (RMC) Guwahati chuan Thawhlehni khan darkar 24 chhungin ‘Red Alert’ an tichhuak a, Nilainiah ‘Orange Alert’ leh Ningani ah ‘Yellow Alert’ an tichhuak thung.
Red Alert hi a sang ber niin chet lak nghal ngai a ni a, Orange Alert hi chu fimkhur tura tihna niin Yellow Alert chu harsatna awm thei a ni ber thung.
ASDMA te chuan tuilian hian Baksa, Barpeta, Darrang, Dibrugarh, Kokrajhar, Lakhimpur, Nalbari, Sonitpur leh Udalguri district ah te mi 34,100 vel te nunphung a tikhaihlak nasa hle an ti a.
Lakhimpur chu tuilianin a khawih buai ber niin mi 22,000 velin harsatna an tawk a, Dibrugarh in zuiin mi 3,900 vel a tibuai a, Kokrajhar ah pawh mi 2,700 velin harsatna an tawk bawk.
Thuneitute chuan Kokrajhar ah hian relief camp an siamah mi 56 dah an ni a, district pali ah chhawmdawlna an pechhuak nghal bawk a. Tun dinhmunah khua 523 lai chu tuiin chim mekin thlai chinna 5,842.78 hectares chu a chimchhe bawk niin ASDMA te chuan an tarlang.
Hei bakah hian erosion nasa tak Barpeta, Sonitpur, Bongaigaon, Dhubri, Dibrugarh, Golaghat, Kamrup, Morigaon, Nalbari, Sivasagar leh Udalguri ah te a thleng niin ASDMA te chuan an sawi bawk a. Cachar, Dima Hasao leh Karimganj ah te ruahsur nasa avang hian leimin a thleng nasa hle bawk.
Heng bakah hian Udalguri, Sonitpur, Darrang, Bongaigaon, Chirang, Dhubri, Goalpara, Kamrup, Karimganj, Kokrajhar, Nagaon, Nalbari leh Barpeta ah te tuilian hian embarkment, kawngpui, lei leh infrastructure a tichhe nasa hle bawk a.
Darrang, Jorhat, Kamrup Metropolitan, Kokrajhar leh Nalbari districts a urban area te chu tuilian in a chim nasa bawk a. Mahse, lui tui te hlauhawm chhinchhiahna chunga luang erawh a la awm lo thung.