PM Modi US zin khawvelin ngaihven hle

Indian Prime Minister Narendra Modi an US a tlawh chuan global economic leh geopolitics boruak inthenah pawimawhna thuk tak a nei a.
White House chuan Modi chu ropui taka lo lawmin diplomatic protocol sang ber pe in White House ah Ningani hian ropui taka lawmna neih a ni dawn a, President Joe Biden nen pawh inbiakna an nei ang.
Chumai bakah state dinner huaihawt ni dawnin CEO rual te nena meeting neiin US Congress joint session ah thusawina a nei hial dawn bawk a.
Indo-US relations piah lamah global order thui taka nghawng thei niin hei vang hian Prime Minister Narendra Modi chu United States chuan a ngai thutak hle.
Indo-Pacific chu US in khawvel hmun dang zawng aia India influence a mamawhna a ni a. US chuan hun rei tak ata tawh helai region a China thiltihtheihna sang zel dan nan chuan India pawimawh bera a ngaih a ni a.
Mahse, Delhi chuan US duhdan ringawtin chet a la ngai lo thung a, tun hnaiah erawh China chu India-US inlaichinna tithata a awm phahna a ni ta daiha ngaih a ni a.
India tan chuan China chu hmelma kumhlun niin ramri buaina nei reng an ni a, nikum pawh khan Uttarakhand state ah India leh US te chuan military drill an nei a, Uttarakhand hi China nena Himalayan border nei an ni. Hei bakah hian Delhi chu Quad- US, Australia leh Japan te telnaah telin hei hi Beijing chuan a haw hle a ni.
Indian diplomacy chuan tun hi global stage a India in a lailum a luah hun a ni tawh an ti a. Chutiang ngaihdan nei tur chuan India chu khawvela ‘economic bright spot’ ber a ni mek a. Geopolitics zawng pawhin ram tam tak ten China ni lo thil siam chhuahna hmunpui an duh a, chutah chuan India chu middle class rual ngah ber niin theihna a ngah bawk si a ni. Hei vang tak hian global firm te chuan China piahah India chu an ngaizawng tlat a ni.
Tanvi Madan, director of The India Project, Brookings Institution, Washington, DC chuan US tana pawimawh ber mai chu India in China chungchang a sawi leh tih a ni tiin a sawi a.
Michael Kugelman, director of the South Asia Institute, Wilson Center think-tank, Washington pawhin US leh India te chuan ‘Indo-Pacific theatre piah lam an thlir tawh’ tiin a sawi bawk.
“Indian Ocean region leh a chhehvelah US chuan western components awm pawimawhna a hrefiah tawh a. Kum tam tak chhung chu India ngaih pawimawh ber chu Indian Ocean region a ni a. US chuan Pacific leh South China Sea a ngai pawimawh thung a. Tunah chuan heng region a maritime security hi an ngaihven zual tawh ang” tiin a sawi.
US leh India joint statement siam chuan tlang hrakin China a sawi lo mai thei a, mahse ram pahnih hruaitute chuan Indo-Pacific chungchang chu thupui berah an nei dawn tih a chiang an ti thung.
China chungchangah thukhat an vaw dun chungin Ukraine war ah erawh an ngaihdan a inang lo thung. Delhi chuan tun thlengin Russia a la sawisel duh hauh lo va, tun hma atanga inthian tha niin defence lama thawk dun rei tawh an ni bawk.
India hian defence lama a mamawh 50% chu Moscow atanga a chawkluh a ni a. Mahse, India hian tun hma atang tawhin non-allignment or strategic autonomy tih chu kalpui reng a ni thung a. Global order ah thuneitu bik emaw duh lo a ni a, hei hi tun hma chuan Washington in India a tei theih lohna ber pakhat a ni thung.
Mahse, tun hnaiah US in a dinna tinem deuhin India in Russian oil a lei zui zelah pawh demna lam hawi emaw a sawi zui a nei lo bawk a. India pawhin chet la deuhin indo tihtawp a nih theih nan ngenna a siam zui bawk.
Ram pahnih hruaitu tena sawihona an neih tur dang chu technology, defence leh global supply chain management lam a ni bawk a. Ram pahnihte hian a hmain Initiative on Critical and Emerging Technology ah inremna an ziak tawh a. He inremna hmang hian US leh Indian firms leh university te, IT, space, defence, artificial intelligence, education leh healthcare lamah te an thawk dun dawn a ni.
Ram pahnih hruaitute chuan technology a bik takin semi-conductor, China chu player lian ber a nihna lamah thawhdunna an nei thei dawn nia sawi a ni bawk a.
Defence lamah chuan India chu Russia ralthuam chawluttu lian ber niin kum 2016 thleng kha chuan Moscow share chu 65% lawih a ni a, mahse kum 2017 atanga 2022 chhungin 45% ah a tlahniam tawh a, helai takah hian US chuan hun remchang hmuin a zawng an ti bawk.
Defence sector a Indian market a Washington share chu 11% chauh niin France 29% pawh a pha lo va, tun hnaiah erawh India chuan US hnen atang hian MG-9A “Reaper” drone a lei dawn a, chu mai bakah GE leh Indian state-run firm te chuan fighter jet engine an siam dun dawn tia sawi a ni bawk.
Sumdawnna lamah pawh US chu India trading partner lian ber ni tawhin $130 billion hu lawih a ni a. Tariff leh export control lamah erawh ngaihdan inang lo an nei thung a, a hmain India chuan free trade agreement Australia leh Dubai te nen ziakin a hma pawhin Canada, UK leh EU te nen an ziak tawh a, tun tuma Modi zinah hian chutiang inremna erawh an la siam dawn lo tia sawi a ni thung.
Sumdawnna lam hi ram pahnih te inkar lam duhthusam lo reng thin tia sawi a ni a. Mahse, tun hnaiah chu chu siamthatin a awm mek a ni.
US leh India inlaichinna hi danglam tak mai niin inrintawn lohna thuk tak tun hma atanga lo nei tawh an ni thung a. Mahse, Joe Biden chuan a hun lai ngeiin India nena inlaichinna siamthat a duh tia sawi a ni thung.