Poetry bu tha ber atan “Thingthlavar” thlang

Mizo Poetry Society (MIPOTY) chuan 2023 chhunga Mizo kutchhuak poetry bu chhuak zinga tha ber atan “Thingthlavar” tih, Nununa Renthlei ziak an thlang.
March ni 21 kha World Poetry Day a ni a, MIPOTY leh Pachhunga University College-a department of Mizo te’n he ni hi an hmang a, poetry bu tha ber ziaktu hnenah hian MIPOTY Book Award an hlan.
He huna khuallian Carol VLMS Dawngliani, art and culture department director chuan poetry lama Mizote kan than dan a sawi a, Mizoram Publication Board-ah poetry bu chhuahsak tura dil an tam thin thu te sawiin thu leh hla ziaktute chu kan ziah theih loh ziaktute an ni, tiin poet-ho ropuizia te a sawi.
Dr. H. Laldinmawia, MIPOTY president pawhin thu a sawi a, Prof. RL Thanmawia, Sr. Adviser & Founder President, MIPOTY chuan
thangtharte poetry hrang hrang dah khawmna bu ‘ZAIKUNG THAR’ Vol – 6 a tlangzarh.
World Poetry Day lawmna hi KC Lalthansanga, MIPOTY secretary-in a kaihruai a ni.
Hun hnihnaah hian Poetry Workshop neih a ni a, Dr. Remlalthlamuanpuia, Asst. Professor, PUC chu moderator a ni a, Lalsangzuala, Asst. Professor, MZU chu resource person niin hun hman a ni.