Police discipline leh a behbawm…

Assam leh Mizoram ramri venga Buarchep hmuna 2nd Batallion MAP duty pakhat chuan a thawhpuite zinga mi pahnih chu silaiin a kap hlum a. Pawikhawihtu hian a duty laiin zu a rui tih chu he thil thleng chanchina langsar tak pakhat a ni. He thil thleng hi a pawi takzet a, pawikhawihtu hi a demawm em em a, chutih rualin, hetiang thil a thlen theihna chhan ‘discipline’ bawhchhiatna a awm rualin, discipline kengkawhtu hotu sang zawkte pawh fimkhur a pawimawhzia a lo lang nghal bawk awm e.
Engati nge duty laiin silai keng chunga zu a ruih theih? tih chu mipui zawhna hmasa a ni a. Police-te chu ram leh hnam venhim hna thawk tura lak an nih avangin rilru leh taksa hrisel leh fit tha ni tura chher hriam (trained) an ni a, thununna (discipline) khauh tak hnuaiah an awm a, thupek an bawhchhiat avangin ram leh hnam, mipui himna a derthawngin a khawlo vek thei a, chuvangin sipai/police inenkawlnaah chuan ‘discipline’ hi a pawimawh em em tih kan hre theuh awm e.
Ramria duty te phei chu an dinhmun a pawimawh lehzual a, discipline pawh tha taka kenkawh a pawimawh a. Tun tuma thil thleng hi entirna atana hman loh theih a ni lo va. Mahni chhia leh tha hriatna hloh khawp emaw, mahni inthunun thei lo khawpa duty-na hmuna zu rui theia an awm a nih chuan, lehlam pawl ramri venga duty-te pawng kah vakna hial thleng thei a ni a; chu chuan nghawng chhe tak a nei zui thei tih kan hre vek awm e. Ramri vennaa discipline bawhchhiaa zu rui chunga duty theia kan insiam a nih chuan, discipline kengkawhtute mawhphurhna pawh a sang hle tihna a ni bawk ang.
Eng pawh ni se, ramri venghim tura duty-te hi kawng engkima thuam that an ngai a, silai tha, tawmhulna him leh tha, ei leh bar, khawsakna changtlung leh tha bakah lirtheia tlan zung zungna tur, engkim mai a tha thei ang bera thuam an pawimawh a. Chutih rualin heng zawng zawng hi discipline tha tak hnuaia vil zui a pawimawhzia tun thil thleng atang hian a lang chiang awm e. Kan police chhuanawm tak takte hian discipline kenkawh kawngah tan la thar thei se a duhawm ta hle a ni.