Police-in Meth’ man

Mizoram Police CID (Special Branch) team chuan an thu hriat bawhzuiin, August 27 khan ruihhlo tawlh nia rinhlelh an veh a. Kulikawn East Presbyterian biak in bulah bungraw phur lirthei, Tata-407 truck MZ04 A 6063 atangin Methamphetamine kg 39.257 a rit (mum nuai 4) an man.
Methamphetamine hi air cooler 17 chhunga dah, Zokhawthar, Champhai district atanga Aizawla phurh thlak a ni a. He lirthei khalhtu leh bungrua leh ruihhlo dawngsawngtu nia sawi – MC Lalnunsiama (34) North Khawbung, Champhai district leh Vanlalhruaii (28), Durtlang Mel-5 te chu a hmuna man nghal an ni a, an bungrua leh ruihhlo nen Special Narcotics Police Station kuta hlan an ni a, thubuai siamsak an ni. An ruihhlo tawlhruk hi black market-a hralhna ang chuan Rs.5,10,34,100 hu nia chhut a ni.