Police quarters sak hna inpek dan chhui turin Lokayukta pun

Mizoram sawrkar hnuaia police quarters sak turah dan bawhchhe zawnga induhsakna a awm ngei nia hria in, chhuichiang turin Lok Ayukta pun a ni.Hemi kaihhnawiha mi intelkhawm hoin thuthar thehdarhtute an hrilh danin, Home department hnuaiah Police Headquaters (PHQ) chuan quarter 26, cheng vaibelchhe 20 man vel an tender-naah dan palzutna a tam hle a. ZPM MLA candidate tling zo lo mi 13 senso rulh letna nia ngaih theihin contract hna pek tih thawm a rik bakah an zingah hian contracy hralh thawmte pawh a ri zui tih an sawi.
Open tender hi dan bawhchhe si loa a chhang hniam ber awm reng siin, chumi chu pe loin tehna pawmtlak awm loin a chhang sang sang pek an nih bakah an duhsak zawng an pek an nih theihnan tender terms and conditions-a an telh miah loh, kumina cancel tawh – PWD Notification 2016 an hmang leh lawi si niin an sawi.
Civil works tender kalphung dikah chuan contractor (bidder) pakhatin a sum leh hmanrua dinhmun a tarlanin a tlin dan azirin hna then dan chhawp chhuah sa pakhat aia tam pawh a chhan theih laiin, tun tuma tender siamah hi chuan, hetiang hi phutna a awm loa, an tlin em tih pawh hriat loh ten hna pakhat aia tam an hmu ta tih an sawi a ni.
“Hei vang tak hian contractor aikal lak kan tih, contractor-te hming hawha 2023 MLA inthlana ZPM candidate tling zo ve lo mi 13-te thawh turin an pe ni awm taka sawi hi a dik ngei a rinawm ta hle,” Lianhmingthanga chuan a ti. A ni hi heng thian intelkhawm zinga Lok Ayukta chhui tura ngentu, a hminga tumtu a ni.
PHQ open tender hi dik lo nia an ngaih avangin High Court-ah PIL an thehlut a. High Court hian contract hna lam hi PIL hmanga chhui theihna dan a lo neih loh avangin kumin October 23 khan Mizoram Lokayukta-ah an thehlut leh ta tih a sawi. Mizoram Lokayukta chairman chuan CBI chhui turin an lo pe dawn tia a lo hrilh thu a sawi bawk.