Police tha leh khawtlang ralmuanna

Thenzawl Police Training School-a police constable passing out parade hmanpuitu chief minister Pu Lalduhoma chuan khawvelah police tha nei ramah khawtlang nun a ralmuang thin, tiin a sawi a.
The Global Safety Report 2025-in khawvel ram hrang hrang dinhmun a zirchiannaah India hi law and order kengkawh tha indawt danah ram 180 zingah 47-na a ni a. Tehna pakhat, “safe to walk alone at night” tihah chuan, ram 144 zingah 59-na a ni. (Law and Order Index hi crime statistic a ni lo tih kha lo hria ila).
Law and Order Index hi zawhna 4 atanga lak a ni a: In bialtu police te i ring tawk em?; Zan lama mahni chauhva kea kal i ngam em?; Thla 12 chhungin pawisa/ thil an ruk sak che em?; Thla 12 chhung khan kutthlak/rawk i tawk em? tihte a ni.
Heng zawhnate hian khawtlang ralmuanna atana police-te pawimawhna a tarlang a. Safety Report-in a khaikhawmnaah, 2024 khan khawvel pum huapin 71% in police an ring tawk, a ti. Ram thenkhat, hetia han ngaih mai pawha indona avanga buai rup rup thin anga langte hi he report-ah hian an sang viau zel a, an score san nachhan chu ram buaina aiin mihring leh mihring inkara pawikhawihna (rukruk, kutthlak) chungchanga an fihlim that vang niin a lang.
India-ah rau rau pawh, Mizoram hi law and order lamah chuan kan score a sang viau maithei e; a chhan chu lung in (prision)-a awm thei zat bithliah (capacity) aia tam daih hi jail-ah an awm deuh reng a, police lamin law and order an kengkawh tha tihna te pawh a ni thei awm e.
Hetih lai hian, kum 20 chhung zet sipai leh police uniform hlauhna/tihna/ngainat lohna lo nei tawh thin kan nihna hi a la reh tak tak lo nge, kan police-te hian zirlohna an la nei em ni tih turin police-te hi ‘tanpuitu’ aia ‘mantu’ anga kan hriatna hi a la lian zawk niin a ngaih theih. Tunhma deuh kha chuan, naupang thuawih lo/tap thlem nan ‘police ka mantir ang che’ tih kha leklam taka neih a nih thin kha.
Tunah chuan kan khawhawi te a lo zau a, ram ralmuang kan lo ni ta a, police-te pawh tanpuitu hmuha kan hmuh thiam tak avangin mipui kan zalen a, chu chu tourist-te pawhin hahipa an sawi a lo ni ta. India ramah pawh state dangte entawn tlak khawpa khawtlang leh ram leh hnam innghahna tlak ni zel turin kan police-te hian tan han la sauh sauh teh se.