Police vote thlak lo te tan ruahmanna siam theih loh – ECI

Vote an thlak ve hmaa Lok Sabha inthlan duty-a state danga chhuak Mizoram State Armed Police Force (SAPF) te tan vote thlak dan tur ruahman theih a ni tawh lo tih Election Commission of India chuan a sawi.
Chief electoral officer office Mizoram thuchhuak chuan, Mizoram SAPF tana hun bituk avanga police 1047-in vote an thlak ngei theih nan hma laksak tura ngenna leh zawhfiahna director general of police Mizoram leh district election officer Aizawl District/ 1-Mizoram (St) Parliamentary constituency returning officer hnen atangin kumin March 27 leh 28 khan an dawng a, Election Commission of India (ECI) ah March 28 hian CEO office hian a thlen nghal a ni.
Bihar leh Uttar Pradesh-a duty SAPF company 12-ten vote an thlak theih nana an duty-na hmuna postal ballot thawn a rem leh rem loh, postal ballot-a vote an thlakte dak hmanga RO hnena thawn let a rem leh rem loh zawh a ni a. SAPF company thum, Madhya Pradesh-a duty tura kumin April 3-a an duty-na state pana che chhuak tur tana facilitation center hawn a rem leh rem loh thu zawh a ni.
ECI hian April 6 lehkha hmangin dan tlawhchhanin election duty-a kal tur voter-te chuan postal ballot chu Facilitation Center-ah ngei an kal dawna vote a thlak a, a thehluh leh nghal a ngaih avangin postal ballot hi dak hmanga inthawn a rem loh thu leh, Mizoram SAPF-te tan vote an thlak theih nan Mizoramah Facilitation Center ruahman turin a rawn hriattir a. Amaherawhchu, inthlan hun bituk leh, Mizoram SAPF-te chhuah hun, Ministry of Home Affairs-in a rawn bituk avangin postal ballot-a Facilitation Center-a vote thlak tura ruahmanna hi company 12 tan hian siam hman a ni lo, tih CEO hian a sawi a ni.
‘Bihar leh Uttar Pradesh-a duty company 12 hi rel hmangin March 28 & 29 ah an chhuah a ngai a. Hetih lai hian candidate-te list final a la nih loh avangin postal ballot hi print theih a la ni lo. Chu bakah candidate-te inhnuhdawh theih hun hi March 30 thleng a nih avangin hma lak ngaihna a awm lo. ECI chhanna hi April 6-a dawn a nih chauh avangin company thum – Madhya Pradesh-a duty turte tan pawh ruahmanna siam a remchang ta lo a, an ni hi April 3-ah relin an lo chhuak a ni,’ a ti.
CEO office hian April 23 khan ECI hnenah vote chhiar ni, June 4 hma ngeia Mizoram SAPF 1047-ten vote an thlak theih nana kawng zawnsak turin ngenna a thlen leh a. He ngenna hi ECI chuan May 1 khan rawn chhangin, a hmaa dan a tlawhchhan tho – ‘Rule 18A of the Conduct of Elections Rules 1961 as amended in 2023’ in postal ballot hmanga vote thlak dan tur a tarlan rawn sawi nawnin, April 19 -a Mizorama vote thlak a nih tawh avangin SAPF-te tan vote thlak theih a nih tawh loh thu a rawn hriattir tih a sawi a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More