POLITICS MAN SUAL

By L. Sailo
Politics hi ram rorel dan tur leh kaihhruai dan tur ruahmanna lam ber a ni miau a, chuvang chuan ram leh a mi chengte lo thanduan chhoh theihna tobul a ni tluk zet hian, kan man sual emaw, kan hman sual emaw ve thung chuan ram leh hnam tluk chhiatna bul pawh a ni hlauh bawk.
Mizote pawhin politics kan hriat ve tan atanga tun thlenga kan politics man sual hi kan thanmawh bawk lian leh kan hnufual chhan bul a la ni ta rêng a ni. Mi thenkhat chuan heng hi hruaitu lam neih that loh vangte, Mizote hnam nun hi a pawnlang chi a nih hrim hrim vangte niin an hria a. Mahse he’ng kan thil mawhchhiat deuh thinte pawh hi, a chhan bul zawk chu, a tir atanga tun thlenga politics kan man sual vang hi la ni cheu zawkin a lang a ni. Politics kan man sual tanna hi politics kan beng hriat tirh atang khan a ni hial awm e.
Mizote hi tunhma chuan khaw tin lal rorelna hnuaia awm thin kan ni a. Mahse kum 1890 chho atang khan Sap ho chuan min rawn awp ve ta a. Khatih lai khan Mizote kan la mawl zualin kan politics dinhmunte kan la hre lo zual nasa a tih theih awm e. Mahse mak leh pawi chu, khatih lai kan politics dinhmun leh kan tun politics dinhmun pawh hi, tun thleng hian kan la hre fuh hlei thei lo cheu nia lang hi a ni. Kan hriat angin British ho khan keimahni chauh ni lo, India ram pum kha an mite sumdawn hmalakna a-talangin an rawn awp a. An awp ram (colony) chauh kan nih angin, an khua leh tui (citizen) erawh kan ni ngai lo a. Kum 1833 vel atang khan an ram awp India-a an hman tur Government of India Acts-te an siam tan a, India an chhuahsan hnaih lamte kha chuan India mite pawh rorel khawla an tel an phal sak ve nual tawh a ni.
Keini Mizote phei chu, kan dep Assam phai leh hmun danga an sumdawnna kan zu tihbuai thin avangin, kan zu tihbuai zui zel theih lohna tawk turin (min rawn ti-hmasawn tur lam ni loin) kum 1890 chho vel atang khan min rawn awp tel ve ta kha a ni a. An thil tum ti-hlawhtling tawk, a hautak lo thei ang ber si-a min awp theih nan, khaw tin lalte chu anmahni khua theuh vil zui tirin, a hma ang deuhin an awp zui tir a. Anni chuan lalte chu thununin an rorel kutke-ah an hmang ta zawk a. Kum 1921-ah Backward Tract-a telh kan ni a, kum 1935-ah Excluded Areaa puan kan ni ta bawk a. Chumi awmzia chu, an awp ram ni mah ila, India ram hmun dangte ang bawka an khua leh tui ni lo leh ram chanvo (citizen right) nei pha lo ve bawk kan nih mai bakah, keini chu India ram tan dan an siam ve ang ang pawh hmang ve pha lo a, min awptu tur an dah Assam Governor / Superintendent of Lushai Hills (Bawrhsap) duh dan ang ang leh an thu ang ang kha min enkawl leh vil dan chu a ni ta ber chauh a. Eng ram chanvo mah kan nei pha lo a, ram leh mipui tih-hmasawnna lam bakah, mihring zahawmna min humsak tur zawng pawhin eng chanvo mah dan hmangin kan lakah an inthabat hek lo. Khatih laia kan politics dinhmun kha chu hniam tak a ni.
Mizo lalte lah hmasang atanga an khua-a lal, roreltu leh thuneitu ber ni thin kha, Sap ho awpna hnuaiah an kutke pakhat an ni ta chauh a. Chutiang dinhmunah chuan, anmahni leh an khaw mipuite hma khua atan an chunga thuneitute thu an zawm kawngah, anmahni nen inpawhna tha leh inkungkaihna tha an siam chu a tulin a pawimawh fo lo thei lo a. Mahse thuneitu ber ni ta lo chu, mi thenkhat zuam, nin leh hmuhmawh an lo kai tan hlauh bawk a. An khaw ni tin khawsak leh inrelbawlna-a hruaitu, mawh latu leh pa chan an lo chan thin avanga hmasang atanga chhiah hrang hrang an lo lak ve thinte leh, ama khua-te hmakhua atana a thiltih phungte thleng chuan a khaw mipuite laka sualna, hleilenna leh lal hrawtna phur rit ni-a hre ta tlatte an lo awm ta a. Telela leh a kawppuite pawhin kum 1926 chho vel khan lal thute chu hnial kalha do letin, Bawrhsap hnenahte an hek thin a. Mahse eng an ang thei lo a, a tawp lamah phei chuan Assam Governor hnenah thleng, lalte mai pawh ni lo, amah Bawrhsap ngei thlengin an hek ta a. Mahse lalte thu leh an kalphung chu, a tlangpuiin pi pute hun atanga Mizote kalphung, khatih hun laia kan politics dinhmun (Excluded Area status) hnuaia thuneitute’n min chhawm chhoh tir a lo ni si a. Tun hun anga, Democracy hnuaia ram khua leh tuite chanvo ang hi, khatih hun lai khan beisei ve a, lal leh Bawrsap-te thu kha ngaimawh ngawt theih a ni tlat lo a; Excluded Area status kha kan politics dinhmun a la ni miau si a. Chuvangin Assam Governor pawh khan an hekna thute kha a lo ngaithlak sak chungin, lalte leh Bawrhsap thute kha tihdanglam tul a ti lo a, a lo pawm ta zawk thin a nih kha.
Khang hun lai atang khan kan mi hmasate khan khatih lai kan politics dinhmunte kha lo man dik ni se, an thil beih kha politics dinhmun sang zawk atang lo chuan hlawhtlinpui theih a ni lo tih an hria ang a, lalte leh Bawrhsapte thu hnial a, lo dodal chiam chiam ngawt thin lo khan, politics dinhmun sang zawk, dan hmanga rorelna emaw, a ni lo berah ‘Partially excluded area’ dinhmun emaw tal pawh Mizoram tan ngiat zawk awm an ni a. A hnu 1952-ah Democracy ram kan lo nih a, politics a lo danglam tak hnu pawh khan, Mizo lalte pawh, an lal a tawp ta thuai mai reng a nih kha! Mahse Mizote’n politics kan man lohna hi, khatih hun lai chauh ni lo, tun thleng pawh hian a la ngai reng niin a lang a. Khatia lal leh Bawrhsapte thu Telela leh a kawppuite’n an lo hnial leh an lo dodal thinte kha, tun thlengin thenkhat chuan khatia ngiaunger nachang an hriat kha politics ber emaw tiin, kha kha ‘Politics-a Mizote harh tanna’ ‘Politics-a Mizote mit tikeutu’ te an ti hlauh a. He’ngte hian Mizote’n politics nihphung hi a bilh atanga kan man sual zia a tilang chiang awm e.
Chumi kal zelah chuan kan tun politics dinhmun pawh hi Mizote hian kan la man sual reng tho niin a lang leh bawk a. Tunah chuan Lalte rorelna hnuai emaw, British rorelna hnuaia ‘excluded area status’ emaw chu sawi loh, keimahni mipuite ngei chu ram roreltu kan lo ni ta zawk a; Democracy kalhmang hnuaiah, politics dinhmun sang em em mai luahtu kan lo ni ta a ni. Kum 1952-ah District Council thuneihna nei tanin, kum 1972-ah UT ni lehin, kum 1986-ah chuan state-a hlan kai kan ni a, mahni inrelbawlin state thuneihna hial kan lo nei ta bawk a. Hetia politics dinhmun sang tak neia kan awm tanna hi kum 70 el-euh ni hial tawh mah se, Sap hoin Excluded area-a min awp hun lai ang bawk khan, kan tun politics pawh hi kan la man lo zui zel niin a lang.
A hmasa berin Democracy chu mipui rorelna ram a ni a. Mahse democracy ram ni reng chungin, kan mi thlante rorelna ram ni tur riakah hian kan ngai tlat a, an rorelna hnuaiah a takin kan awm tlat rêng bawk a!
Mipui rorelna ni loin, MNF rorelna / Cong rorelna-te kan nei thin hlauh a. Mipui sawrkar ni loin, Pu Hawla sawrkarte, Pu Zoramthanga sawrkarte kan nei thin bawk a ni. Mipui rorel tih chu, tawngka-ah bak kan thinlungah a awmzia leh enge a nih kan hre lo a. Mipui rorel chu a thu chauha awm anga ngaiin, mipuite’n ram roreltu kan invuahna vena lai chu, kan ram roreltute hi kan mi thlan an nih thinna laiah hian a ni berin a lang a. Mahse kum 5 dana ni khata minute rei lo te chhunga vote kan va thlak keuh ringawt thin hi, ram rorelna chu a ni mawlh si lo tih chu a hretute vek kan ni! Kan mi thlante’n thlan tlin an nih hnua an duh dana ro an rel thinziate en phei chuan, an rorel hi mipui rorel a nih theih lohzia chu a chiang lehzual.
Kan ram danpui chuan kan ram chu mipuite rorelna ni turin a duang a. Mipuite rorelna leh chumi anga ram kalphung tur chu, he danpuiah leh, chumi sawi chipchiarna dan (Acts, Rules, Codes, Regulations .. i.e., Laws)-ahte a inziak sa a. Chu’ng Laws-a kan ram kalphung tur leh thiltih phung tur inziakte chu mipui rorelna chu a ni mai a. Mahse kan ram hi ‘democratic republic’ ram a nih angin, inthlana kan mi thlante chu kan aiawha kan rorel (dan rorel) kengkawh tur leh, he’ng ram dante viltu tura ruat an ni ta a. Helaiah hian mi tam takin kan mi thlante hian mipui rorelna kenkawhah mai ni loin, ram rorelah ber pawh hian mipui ai an awh niin an hria a. Hei hi kalsualna ril leh pawi lutuk a ni.
Kan mi thlante hian mipui rorel kengkawh tur chuan kan ai an awh ngei mai, kengkawh tur pawhin thu an tiam vek reng a ni. Mahse ram rorel tur chuan kan ai hi an awh lul lo; kan nupuite laka pasal kan nihna ai min awh tel lo ang tluk hian, ram rorel tur chuan mipui ai an awh mawlh lo. Awh ni se kan ram hi mipui rorelna ram (Democracy) a ni thei ngai nang! Mipui rorel (ram dan rorel) hi kengkawha kan aiawha ram hruaitu tur erawh an ni chauh! ‘Ram rorel’ tih leh ‘Ram rorel kenkawh’ tih hi ngaih pawlh loh tur; a danglamna hi kan hriat duh chuan, lal lal lai khan ram ro chu lalin a rel a, a rorel chu a khawnbawlte’n an kengkawh thin. Chutiang bawk chuan democratic republic ramah pawh, mipuite’n ro an rel a, an rorel chu ram dan (Laws) hi a ni mai a, an aiawhin an mi thlante’n an rorel (Laws) chu an kengkawh tur a ni. Chu chu mipuite’n kan mi thlante kan thlan chhan leh, kan mi thlante tihtur leh an mawh lian ber chu a ni!
Hetiang hi kan ram politics dinhmun leh kalphung tur a nih reng laiin, tunah pawh hman ang bawkin, hei hi kan man sual leh nasa ta a. Kan mi thlan-te awm dan leh thuneih dan chu, mipui rorel (dan rorel) aiah anmahni rorel an tung ding a, an rorel chu anmahni’n an kengkawh bawk a, ‘kan thlan lalte’ tih tur awm rengin democracy ramah si, lal ang an khawsa a, chutiang chuan tur reng chuan mipuite’n kan hmu bawk a, a bikin Executive lama thunei teltu Minister-te phei chu, mipuite zawkin kan intlawn siak a, lal angin kan zawn vu vu ta bawk thin rêng a. Minister ni ve em lo MLA-te pawh, Minister pa tê (lal tenau) angin an khawsa tlat a, mipuite’n chutiang tur chuan kan hmu ta bawk a. Tun hma kan politics dinhmun (excluded area status)-in lal min neih tir laiin lal kan ngai thei lo a, tunah kan politics dinhmuna lal an awm theih tawh loh hnu-ah lêm kan mi thlante chu kan lal hmuh (pawm) leh tlat lawi hlawm a nih hi! An hna ber, ‘dan siam’ lamah thung chuan phut neih nachang pawh kan hre lo leh hlauh a. Tichuan kan mi thlante hian lal ang maiin, an State thuneihna-te, Sawrkara an thuneihna-te, Party-a an thuneihna-te chu an duh lai laiah ram dan (mipui rorel) chunga an duh dan laltir nan an hmang ta mai thin a ni ber a, chu chu kan thanmawh bawk a ni ta a. He’ngte hi kan politics man sualin a hrin an ni ta a ni.
Hetiang tak hian kan ram politics leh a kalphung kan man sual dan hi hman atanga tun thlengin a nasa a. Chuvangin khawvel ram tam takin mipui rorel (dan rorel) hi an ram leh hnam siam ropui nan leh siam hmasawn nan, a bulpui ber atan an hman thin laiin, kan ramah erawh politics (ram kaihhruai dan tur ruahmanna) ber hi kan man sual tlat reng avangin, a thlawna sum tam tham lutuk kan dawng kum tin reng chung pawhin eng kan nih pui thei ngai chuang lo a, ram leh hnamin kan tlakchhiat phahin, kan hnufual phah ta reng zel zawk a nih hi! Kan ram politics hi man dikin, mipui rorelna hi tungding ila, chu chu kan that chhuahna tur kawng awmchhun a ni. Chuta tang chuan thil dang engkim hian kan ramah rah tha chhuahin, an la par vul thei chauh ang.