Politics ngaihven…

Politics han tih hian, a tawi zawngin ‘ram inrelbawlna’ tiin a sawi theih awm e.
Tunhma deuh kha chuan Mizote hian politics kan hmuh dan leh ngaih dan a dik thin loh avangin ‘politics ngaihven’ nih kan duh lo thin a; ‘politics-ah ka inhmang ve duh lo’ emaw ‘politics ka ngaihven ve hman lo’ emaw kan ti liam leh puat mai thin. Political party-a inhnim phum a, party chhunga akul ataia inhman kher chauh kha emaw politics kan ti thin niin a lang.
Hun a lo kal zel a, kan ngaihven that duh loh ‘politics’ kha kan ni tin khawsak phung innghahna bulpui ber a ni tih kan lo varpawh chho ve hret hret a. Tunah chuan mipui lam pawhin politics ngaihven dan kan thiam chho ve ta.
Politics ngaihven dan hi kawng hnihah a then phawk theih a, political party chhung atanga ngaihven leh political party chhunga awm kher lova a pawn lam atanga ngaihven.
Political system-ah democracy kan nih avangin mipuiin rorel tur aiawh kan thlang thin a, hei hi politics-a a pawimawh lai ber, a laimu a ni kan ti thei ang.
Ram inrelbawlna hna pawimawh tak chelh a, thawk tur kan thlan chhuah kawngah hian politics ngaihven lo tan chuan mi tha leh tling thlan tur a hriat ve theih loh; politics ngaihven lo chuan hruaitu tha a thlang ve thei dawn lo tihna a ni.
Hruaitu nge pawimawh mipui tih zawhna hi chhanna dik zawk sawi theih loh a ni a. Hruaitu thain ram a hruai chuan hmasawnna a kal zawt zawt thin, India ram state thenkhatah a dikna kan hmu mek. Chutih rualin, a lehlamah chuan, politics ngaihven lo mipui chuan khatiang hruaitu tha kha a thlang chhuak thei hauh lovang.
Ram hmasawnna thawk thei tur hruaitu tha hre tur chuan politics ngaihven a pawimawh tih a lang a. Keini state-ah hian, UT kan nih atanga tun hun thleng dinhmun han thlir kir hian, hruaitu nge pawimawh mipui tih zawhna hi han inzawt ta ila, hruaitu tha pawimawhna leh, chutiang hruaitu tha thlang chhuak thei tura politics ngaihven a pawimawhzia kan hre theiin a rinawm.
Kan hma lawkah inthlanpui kan hmachhawn leh dawn a ni a, kum nga chhung ram kaihhruai hna thawk tur thlanchhuah kawngah hian mipui (voter) te hian urhsun taka mahni chhia leh tha hriatna thiang tak hmanga ram hruaitu tur kan thlan phawt chuan hruaitu tha kan thlang chhuak thei ngeiin a rinawm a. Hruaitu tha thlang thei tur chuan, kan ram inrelbawlna kalphung leh a behbawm kan chik peih a, kan ngaihven ve zel erawh a pawimawh tih a lo lang nghal mai awm e.