Politics ngaihven turin thalaite sawm

Aizawl Municipal corporator Christina Roluahpuii Sailo chuan ram tana hruaitu tha tur kan vote chhuah theihnan kan ram politics ngaihven ve turin a thalai puite leh nu leh pate a ngen tih a sawi.
Inrinni khan ZPM party chuan Aizawl khawpui lun lai hmun li ah street campaign an nei a. Zemabawk bazara thusawitu, AMC corporator Christina Roluahpuii Sailo chuan, kan ram siamthat hna chu party hruaitute leh party-a inhmangte kut ringawta dah loin, kan vote hmangin tih theih kan nei ve a ni tih hre nawn turin mipui a chah.
“Kan ram tana tha tur ngei kan vote chhuah theihna’n kan ram politics ngaihven ve turin ka thalai puite leh nu leh pate ka ngen a. Keini party chuan kalphung thar mipui sawrkar kan rawn zuar a. Kalphung thar kan tih hi party dangten hrethiam duh loin kan ram kal dan mek hi tha lo ti vek angin min chhuah lui thin. Kan ram hruaitu ni mek leh lo ni tawhten thil tha tam tak kan ram tan an ti a, kan hotute hian chhunzawm tlak chu an chhunzawm ngei ang,” a ti.
Durtlang Leitana thu sawitu MLA Dr Vanlalthlana chuan ZPM=in kan ramin hmasawnna hmel thar a hmuh theihna’n danglam ngam turin an infuih thin a; hei hi party dangten beihna’n an hmang nasa tih a sawi. “ZPM hi kan din tirh atangin beih kan tawk nasa a, kan do dai ve zel a, heti khawpa min bei chunga hma kan sawn ve bek bek zel hi engdang vang niloin, Pathian hian Zoram kaihruai turin min duh ve tawh ni te pawhin a lang. Beidawng kalkhawm niloin beiseina thar nei kalkhawm kan ni,” a ti.