Politics tuinua inhnim phum lo turin MLA-in zirlaite chah

Tunlai politics tuinu ah zirlaite chu inhnim phum ve lo turin MLA Ramthanmawia chuan a chah.
January 6-8 chhung hian Tuipuiral Zirlai Pawl (TZP) General Conference vawi 40-na chu Farkawnah neih a ni a. Hmanpuitu East Tuipui bialtu MLA Ramthanmawia chuan zirlaite chu tum mumal tak neia lehkha zir turin a fuih a; zirlaite chu nun tichhe theitu ruihhlo do tur leh ruihhlo laka filim turin a chah. Tunlai politics tuinu ah zirlaite chu inhnim phum ve lo turin a chah bawk.
Kan ram chereu sawt zia leh tuihna kang chak zia ngaihtuah a, kan tu leh fate tana chenna tlak tura kan ram kan siam a ngai tih Ramthanmawia hian sawiin, “Nakin lawkah tui lak tur mumal nei loin khawtin deuhthaw kan buai dawn. Hei hi a veiawm ka ti a, khawtinah tlangau zel a tul. Zirlaiten kan vei a, awarness campaign kan theihna apianga kan neih zel a tul a ni,” a ti.
Conference-ah hian HSLC chin chunglam pass thate lawmpuina leh HSLC leh HSSLC a Tuipuiral huamchhung school 100% pass-te lawmpui hlan an ni.
East Tuipui bialtu MLA hian Farkawn PHC tlawhin thawktute nen PHC mamawh an sawiho a. X ray khawl thawmthat ngai chu theihtawpa a lo bawhzui tur thu sawiin, mamawh dangte pawh a lo hriat tur thu PHC-a thawkte hi a hrilh a ni.