Polling official-te zirtir

November 7-a neih tur MLA inthlanpuia Champhai district-a duty tur polling official-te tan Thawhlehni khan Champhaiah an hriat tur inzirtir tan a ni.
Champhai district-a Assembly constituency pathum – Champhai North, Champhai South leh East Tuipui biala polling station 84 a duty turin polling officials 452 ruat an ni a. Training hi ni hnih chhung neih tur niin, a ni khatna hi presiding officer-te leh polling officer-I te tan a ni a; vawiinah polling officer-II leh polling officer-III te tan neih a ni ang.
Settlement officer Lalhruaitluangi, SDO (S) Lalrinawma Khiangte, Khawbung BDO N. Lalzarzova, SDC Moses Lalfakawma Tlau leh SDC Dr Vanlalnunpuii Ralte ten zirtirna an pe a. Polling official-te mawhphurna hrang hrang leh postal ballot chungchang bakah EVM chungchang an zir a ni.
Inthlanpui neih turah hian Champhai district hi sector 12-a then niin, Champhai North-ah sector 4, Champhai South-ah sector 3 leh East Tuipuiah sector 5 a awm a. Heng sector-ah hian sector officer leh sector police officer ruat an ni tawh a, an duty chhuak tawh. Election Expenditure Monitoring hnuaia team hrang hrang – Flying Squad, Video Surveillance Team, Static Surveillance Team chu duty chhuak tawhin, uluk takin model code of conduct leh expenditure te an enfiah mek zel a ni.
Champhai district final electoral roll-ah voter 57180 an awm a, an zinga 27880 chu mipa niin, hmeichhe 29300 an awm a ni.