Pollution Control Day pualin zirlaiten bawlhhlawh thianfai

Pollution Control Day pualin
zirlaiten bawlhhlawh thianfai
December 2 kha National Pollution Control Day a ni a, India ram pumah faina leh thianghlimna kawnga inzirtirna leh a taka thawk chhuakin hun hman a ni. Mizoramah chuan Mizoram Pollution Control Board (MPCB) bultumin district hrang hrangah hman a ni.
Pollution Control Day denchhen hian Mizoram district hrang hrangah District Education Office leh MPCB kaihhruaiin School Eco-Club naupangte nen a huhoa kawngpui leh lui dung thenfai runpui neih a ni a, mi 5000 chuang an thawkchhuak.
Aizawlah chuan MPCB staff-te leh school thlan bika Eco Club member-ten Tuikual lui, Lawibual lui leh Chite luia hmankhat daih sarang lam bawlhhlawh chharin an hnatlang a, bawlhhlawh chharkhawm hi Tuiriala bawlhhlawh sawngbawlna hmunah paih nghal a ni
Kumin Pollution Control Day pual hian MPCB chuan ‘Clean Air, Green Earth’ tih thupui hmangin thlalaka lama intihsiak leh online-in poster insiamsiak buatsaih bawkin, boruak thianghlim (clean air) pawimawh zia inhrilhnan November 30 zing khan Mizoram University Eco-Club member-te nen vantlang campaign neih a ni.
MPCB chairman Liankima Lailung, IFS (Rtd.) chuan thangthar lo awm leh zel turte tan chenna tlak kan hnutchhiah theihna’n tuna cheng mekte hian uluk taka kan enkawl a tul tih a sawi a. MPCB member secretary C Lalduhawma pawhin India ram khawpui zinga boruak thianghlim ber kan nih mekna vawnghim zela halpuah leh bawlhhlawh hal mai mai lo turin mitin a ngen tih a sawi a ni.
Kumtin December 2-a hman thin he ni hi kum 1984-a Bhopal Gas Tragedy-a nun chân ta te hriatrengna atana tih niin, mipui hnena pollution chungchang inzirtir leh environment humhima tibawlhhlawh lo zawnga khawsa tura infuihtharna atan hman thin a ni.