Portugal chakpuitu Ronaldo

June 20, Thawhleh zan khan Euro 24 khel tur zawnna UEFA European Championship Qualifying khelh chhunzawm a ni a, Group J-a hmahruaitu Portugal chuan Cristiano Ronaldo goal thun hmangin Iceland an hneh a, hma an hruai chhun-zawm. Iceland laka Portugal chak-puitu Cristiano Ronaldo hian mipa lamah ram tan vawi 200 khel tling thei hmasa ber record thar a siam. Portugal an chak lai hian an hnuai chiaha awm Slovakia pawhin hnehna an chang a, Portugal an kal hlattir duh bik lo.
Iceland mual Laugardalsvöllur, Reykjavik-a inkhelah hian goal a lut har hle. Portugal hian ball chang tamin, hlauhawm siam tam zawk bawk mah se 11 ve ve an nih laiin goal an thun thei bik lo. Khelh thum atanga point thum chiah la hmu Iceland hian an mualah point hmuh ngei tumin tan an khawh a, player nei tha Portugal lakah him pawh an him rei viau nghe nghe. Rei tak chhung goal chhuah lovin awm bawk mah se hun tawp dawn hnaih minute 80-naah Willum Thór Willumsson hnawh-chhuah a ni a, tlem zawk an nih hnuin an tan chet a harsat leh zual phah.
Tam zawk an nih hnuin Portugal hi huai zawkin an inlan a, an khingpuite an nawr na ta viau bawk. Na taka an khingpuite an nawr rah an seng ta nge nge a, minute 89-naah Cristiano Ronaldo chuan rawlthar Inácio siam tha tak chu tha takin a tauh goal a, hmahruaina goal a thun. Ronaldo goal thun hi offside vangin pawm a ni lo zet a, VAR rawn a nih hnuin goal-ah pawm a ni leh ta zawk . Tichuan, Ronaldo goal thun hmangin Portugal chuan 1-0 in Iceland an hneh zui ta a ni.
Portugal hian Euro 2024 khel tur zawnnaah vawi 4 khel tawhin an la chak vek a, point 12 an hmu mek. Portugal hnuai chiaha awm Slovakia chuan khel li atanga point 10 hmuin, Portugal an kal faltir duh bik lo.
Iceland laka chakna goal thuntu Cristiano Ronaldo chuan ram tan vawi 200 a khel tling ta chiah a, mipa lamah ram tan vawi 200 khel tling hmasa ber a ni a, record thar a siam. Record thar a siam hnu hian Guinness World Records chuan a record siam ngaihhlutsakin Certificate an hlan. Player ropui Ronaldo hian Kum 2003 atang khan Portugal senior team tan a khel tan. Kum 20 zet chhungin inelna hrang hrangah vawi 200 zet a khel tling tawh a, mipa lamah ram tan khel tam ber a ni. Ronaldo hian march thla khan ram tana khel hnem ber ni thin Kuwait forward Bader Al-Mutawa record vawi 196 chu a lo khum fel tawh. Mutawa record a khum tum hian Guinness World Records chuan certifivate a lo hlan tawh bawk. Ram tan vawi 200 a khelh atang hian goal 123 zet a thun tling tawh bawk a, ram tana goal thun hnem ber a nihna a tihzau belh zel. Ronaldo anga player tha leh tlo hi an vang viau tawhin a rinawm a, a record hi khum har hle tawh tura ngaih a ni.
An len luhna mualah Portugal an chak laiin an hnuai chiaha awm Slovakia chuan Mimualah hnehna an chang ve bawk a. An group a point la hmu ve lo Liechtenstein chu minute 45+1 naa Denis Vavro goal thun hmangin an hneh. Slovakia pawh hi khelh li chhung tlawm nei lovin an kaltluang tawh a. Portugal nen Group champion nih an inchuh zui viau tura ngaih a ni.
Group J-a inkhel dangah Luxembourg chuan an khingpui Bosnia and Herzegovina chu si hnih faiin an hneh a, khel li atanga point 7 hmuin pathumna an luah chhun-zawm. Luxembourg tan hian Yvandro Borges Sanches chuan minute lina lekah hmahruaina goal a thun a. An goal hnihna hi minute 74-naa Danel Sinani thun a ni.