Scotland an chak zel

Euro 2024 khel tur zawnna neih mekah Scotlan an khel tha chhunzawm zel. Group A hmahruaitu Scotland hian thawhleh zana an khingpui Georgia chu si hnih faiin an hneh a, point riat zetin hma an hruai fal tawh. Thawhleh zana inkhel dangah Norway chuan Haaland goal hnih thun hmangin hnehna an chang ve bawk.
Scotland hian Hampden Park-a an mikhual Georgia lakah bul an tan tha viau a, inkhel tan atanga minute 6-na lekah hmahruaina goal an thun nghal. Minute ruknaah hian Callum McGregor chuan hma hruaina goal a thun. An mualah hma takah goal thunin, phurna namen lo tak nen inlan zui mah se chawlhlawk hmain goal dang an thun belh thei lova, si khat faia hmahruai chungin chawlhlawk an hmang.
Chawlhlawk hnu lamah Scotland in bul an tan tha nawn leh a, goal an thun leh thuai. Second half tan atanga minute khat hnu lekah Manchester United midfielder Scott McTominay chuan an goal hnihna thunin, an hmahruaina a tizau. Scott McTominay goal thun hnu hian goal dang a luh belh tawh lova, Scotland chuan an mualah si hnih faiin hnehna an chang a, inelna lian hmachhawn turin an tling teuh tawh hle.
Haaland bawk
Group A hmahruaitu Scotland an chak zual hial an Norway chuan Erling Haaland goal hnih thun hmangin Cyprus an hneh a, pathumnaah an inhlangkai.
Norway hi Ullevaal Stadion-a an mikhual Cyprus lakah an khel tha viau a, goal pawh an thun hma hle. Minute 12-na lekah Ola Solbakken chuan Haaland siamsak atangin hmahruaina goal a thun. Minute 12-naa an goal thun bak hi chawlhlawk hmain goal dang an thun belh thei lo.
Chawlhlawk hnu lamah Norway an khel tha leh zual a, goal hnih an thun belh. Minuye 56-naah Manchester City goal thun khawl Erling Braut Haaland chuan penalty atangin an goal hnihna a thun a. Haaland hian minute 60-naah an goal thumna a thun belh zui leh a, an hmahruai a tizau. Premier League leh Champions League top-scorer Haaland hi ram tan pawh a khel tha chhunzawm viau a. Norway tan a khelh hnuhnung vawi hnihah goal thum a thun. Ballon d’Or dawn tura rinkai zual zinga mi Haaland hian chawimawina sang dawng turin ram tan chet that a mamawh a, a mamawh ang takin a chetha zui ta viau bawk. October thlaa semchhuah tur Ballon d’Or dawng turin Lionel Messi nen an inel zui viau tura ngaih a ni.
Norway lakah si thum fai ngawta an hnufual hnuin Cyprus hian hun tawp dawn hnaih minute 90+3-a Grigoris Kastanos goal thun hmangin an si phurh an sut then naa, an si phurh an sut zo thei lo.
Tarlan tawh angin Group A-ah hian vawi li chak zawn tawh Scotland chuan point riat zetin hma an hruai fal mek a, an mahni hnaihtu pahnih; Georgia leh Norway ten point li ve ve an hmu mek a. Spain chuan khelh hnih atangin point thum an hmu a, palinaah an awm mek a. khelh li atanga point la hmu ve lo Cyprus in table mawngphah an luah mek.