Portugal in Luxembourg an sawp

Thawhleh zan khan Euro 2024 khel tur zawnna khelh chhunzawm a ni a, Portugal chuan 9-0 ngawtin Luxembourg an sawp. Khelh ruk chhung chak zawn tawh Portugal hian Euro 2024 khel phak turin vawi khat chak chiah an mamawh tawh. Portugal rual hian an group-a pahnihna Slovakia pawhin si thum faiin hnehna an chang ve bawk.
Group J-ah vawinga chak zawn tawh a, hmahruaitu ni mek Portugal hian Estádio Algarve-ah point 10 lai hmu tawh Luxembourg an mikhual. An muala an inlan tum hian an captain Cristiano Ronaldo chu hrem vangin a inlan thei lo. Portugal tana goal thun hnem ber Ronaldo inlan thei lo mah se Portugal in goal an thun thiam hle tho a, chawlhlawk hmaa goal li an thun bakah, chawlhlawk hnu lamah goal nga ngawt an thun belh leh bawk.
Portugal hian an mualah bul an tan tha viau a, minute 12-na lekah Gonçalo Inacio chuan Bruno Fernandes siamsak atangin hmahruaina goal a thun. Goal hmahruai an thun atanga minute ruk hnu lekah Goncalo Ramos chuan Bernardo Silva siamsak atangin an goal hnihna a thun zui leh zat bawk. Goal hniha hma an hruai hnu hian minute 33-naah Romos hian Rafael Leão siamsak atangin an goal thumna a thun zui leh a, an hmahruaina a tizau.
Darkar chanve an khel tling awrh tiha goal thum an thun hnuin Portugal an khel tha chhunzawm a, chawlhlawk hmain goal an thun belh leh. Minute 45+4-ah Goal hmahruai thuntu Inacio chuan Bruno Fernandes siamsak atangin bawkin an goal lina a thun zui leh a. Si li faia hmahruai chungin chawlhlawk an hmang.
Chawlhlawk hnu lamah Portugal an khel tha chhunzawm a, goal an thun zui leh nghal zawt zawt. Minute 57-naah Diogo Jota chuan Bruno Fernandes siamsak atangin an goal ngana a thun. Darkar khat em pawh an khelh tlin hmaa goal nga ngawt an thun vangin chak zawk tur a chiang tawk viau tawh. Luxembourg hian an si phurh sut tumin tan khawh thin mah se an bet lak lawh a, hun tha an insiamchhuah thei lova, goal li ngawt an chhuah belh leh ta zawk.
Minute 67-naah Ricardo Horta-a’n an goal rukna a thun hnuin Liverpool forward Jota chuan minute 77-naah an goal sarihna a thun zui leh. Jota goal hnihna a luh hnu hian goal thum lai siamchhuak tawh Bruno Fernandes chuan an goal riatna a thun ve leh. Fernandes-a’n Luxembourg lakah goal li ngawt a thawkchhuak hian Manchester United a ti lawm hle a. Inelna hrang hrangah hmachhawn chhoh turah an captain hi goal thawkchhuaktu pawimawh tak a nih chhoh ngei an ring a, a lakah beiseina sang zawk an neih theih phah.
Si riat laiin hmahruai tawh mah se Portugal an duhtawk mai lova, hun tawp dawn hnaih minute 83-naah João Félix hmangin goal an thun belh leh. Goal kua ngawt an thun hnuin goal thun belh tum viau mah se an hlawhtling thei ta bik lova, 9-0 in an chak zui ta a ni.
An mualah awlsam taka an chak vangin Portugal hian Euro 2024 an khel phak teuh tawh hle. Inelna lian hmachhawn turin khelh thum khelh hmabak an la neihah point thum chiah an mamawh tawh. October 13 a an mikhual Slovakia an hneh a nih chuan Euro khel turin an tling chiang thei tawh dawn.
Awlsam taka Portugal an chak rualin Slovakia pawhin an mualah hnehna lian an sualchhuak ve bawk a, an mikhual Liechtenstein chu si thum faiin an sawp. An mualah awlsam taka point thum an hmuh hmangin Slovakia hian Luxembourg an tlansan a, pahnihna an luah nghet.
Slovakia hian Národny Futbalovy Stadión-a an mikhual Liechtenstein lakah awihawm loh khawpa thain bul an tan a. Inkhel tan atanga minute ruk chhung lekin goal thum an thun hman der. Minute ruk chhung lekin goal thum ngawt thun hman mah se hun tawp thlengin goal dang an thun belh thei tawh lo teh tlat thung a, goal an chhuah lo tluan hlauh bawk.
Slovakia hian inkhel bul an tan chauh tihah goal an thun nghal der a, David Hancko chuan goal a thun nghal der. Hma takah goal an thun vangin Slovakia an phur em em a, an mualah inringtawk takin an inlan zui theih phah. Slovakia an phur em em laiin Liechtenstein erawh chu hma taka goal an chhuah vangin an talbuai a, an hnual em em thung. Mak tia Liechtenstein an hawihai laiin Slovakia in goal an thun belh zui leh nghal zat a. Minute thumnaah Ondrej Duda chuan an goal hnihna a thun. An goal hnihna an thun hnuin an mikhual talbuai phili nasa tak an nawr zui leh nghal zat a, goal an thun belh leh thuai. Minute ruknaah Róbert Mak chuan an goal thumna a thun a. Heng goal thumte hi point thum hmuh nan an hmang zui ta a ni.
Group J-ah hian vawi ruk chak zawn tawh Portugal in point 18 hmuin hma an hruai fal mek a. An hnuai chiaha awm Slovakia in point 13 an hmu mek a, pathumna Luxembourg in point 10 an hmu mek a. Bosnia and Herzegovina leh Iceland in point ruk ve ve an hmuh laiin Liechtenstein erawh chuan point an la hmu ve lo thung.
A chung berah Croatia
Thawhleh zana inkhel dang, Group D-a inkhelah point sarih hmu tawh ve ve Croatia leh Armenia te an inhmachhawn a. Mimualah si khat faia hnehna chang Croatia chu Group D hmahruaitu thar an ni.
Hmahruaitu thar ni tur chak mamawh Armenia leh Croatia te hi an inhnehtawk viau a, Croatia in minute 13-naa goal an thun an chakpui thei hram. Minute 13-naah hian Andrej Kramaric chuan Croatia chakna goal ni zui ta a thun. He goal hmang hian point thum hlu tak an hmu a, khelh nga atanga point 10 hmuin, hmahruaitu thar an nih theih phah.
Group D-a inkhel dangah Wales chuan Skonto Stadions-a an khingpui Latvia chu si hnih faiin an hneh a, point thum an hmu ve bawk. Wales goal hi Aaron Ramsey leh David Brooks te thun a ni.