Position thlak langsar zual 10
Inrinni zan khan Germany chuan an mikhual Turkey an hneh lo. An mualah ngei Turkey an hneh loh tum hian Chelsea forward hlui, Arsenal in midfield-a an chhawr thin Kai Havertz chu manager Julian Nagelsmann chuan left-back-ah a hmang teuh tlat a, Havertz hi a position tharah a khel tha phian a, goal a thun hial nghe nghe. Havertz hi footballer lar, position thlak langsar thar lam a ni a, tun tumah hian position an thlak hnua hlawhtling zui ta 10 kan tar lang ang.
Thierry Henry
Arsenal forward ropui ber ang hiala sawi zui ni reng tawh tur Thiery Henry hian Arsenal a zawm hma, Juventus tan a khelh lai chuan mual sir lamah tlanin winger a ni. Winger hlawhtling a ni hrang lo. Kum 1999 khan Premier League club lian a zawm. Arsenal manager Arsene Wenger chuan Henry hi a tlanna a thlak thleng a, striker niin, number nine role a player tir. France striker hian a position tharah a khel tha zui ta viau a, Arsenal tan hian kum riat chhungin inelna hrang hrangah goal 228 zet a thun hman. A position a thlak fuh em EPL striker tha ber zingah sawi tel zui zel a ni.
Gareth Bale
Real Madrid leh Wales winger lar Gareth Bale hian kum naupang te ni chungin Southampton a chhuahsan a, Tottenham Hotspurs a zawm. Spurs a zawm tirh thleng hian left-back a ni thin. Tottenham tan a khelh hnuin position tharah khelhtir a ni a, winger a lo ni ta. Winger a nih hnuin a hlawhtling zui viau a, khawvela footballer manto ber ni turin Real Madrid in an la lut ta hial. Real Madrid leh Wales tan a vui zui hle nghe nghe. Bale hian club leh ram tan a khelh chhungin goal 227 a thun.
Javier Mascherano
Argentina midfielder khel rum ve thei tak Mascherano hi Liverpool tan a khelh lai thlengin defensive midfielder a ni a, a hna a tlin thei viau thin. Liverpool chhuahsana Barcelona a pan hnuin a position a thlak a, centre back a ni ta thung. A khelhna tharah pawh a khel tha zui viau a, a buai zui lem lo. Mascherano hian Barca hi champions league-ah vawi hnih a champion pui nghe nghe.
Vincent Kompany
Manchester City centre-back ropui, an captain tha mi Vincent Kompany kha a khelhna hmasa chu muallaiah a ni a, midfielder tha thawkhat tak a ni. Hun engemaw chen midfiel-ah a tlan hnuin centre-back ah tlantir a ni a, a position a thlak fuh hle a. Manchester City leh EPL defender tha sawi apiangin sawi lan zinga tel reng tawh tur a ni.
Cristiano Ronaldo
Mi tam takin footballer ropui bera an ngaih Cristiano Ronaldo hian football a khelh chhunga a hun chanve vel zet chu mualsir lamah hmangin, winger a ni. A hun chanve hnu lamah erawh striker anga chhawr a ni ta fo a, goal pawh a thun thei hle. Champions League-ah goal thun hnem ber a ni a. Ram tan goal thun hnem ber a ni fal hle tawh bawk. Ronaldo te anga pian tha, tlanchak, taima leh thawkrim te ang hi chu khawi position-ah pawh an tha em em vek thung.
Andrea Pirlo
Midfielder fing, ball pet thiam, cool ruih hin Pirlo hi a khelhna hmasa chu forward a ni. Forward a nih laiin ball thiam viau mah se a tlan chak tawk lo thin. Amah hrechiangtu Carlo Ancelotti chuan a khelhna hmun thlaksakin midfield-ah a chhawr a, a tifuh hle. Midfielder tha tia sawi reng tawh turah Ancelotti hian Pirlo hi a chherchhuak a tih ngam.
Gareth Barry
Hmel pa vang mai Gareth Barry hian khawi hmunah pawh a khel thei deuh vek mai a, coach te pawhin an mamawh angin an chhawr kual mai thin. Mamawhna hmunah chhawr kual theih ni bawk mah se Martin O’Neill chuan midfield-ah a chhawr ta rawt a, Aston Villa midfielder tha tak ni zuiin, Manchester City chu Premier League leh FA Cup-ah a champion pui ta hial a ni.
Philipp Lahm
Germany leh Bayern Munich player lar Philipp Lahm hi defence a ni, defender tha tak a ni a, club leh ram tan hlawhtlinna hrang hrang a chang. Manager lar Pep Guardiola-a’n Bayern Munich a enkawl tum khan Lahm hi midfield-ah a chhawr a, central midfielder tha tak a ni. World Cup 2014-ah an champion tum khan midfield leh defence-ah a khel kawp a, player pawimawh tak a ni.
Sergio Ramo
Centre-backs tha sawi changa sawi hmaih thiang lo tluk Sergio Ramos hian right-back niin bul a tan. Hun eng emaw chen right back-ah a khelh hnuin a laiah a insawn. A khelhna thlak mah se centre-back tha tak a ni zui a. World Cup leh Euro-ah Spain a champion pui bakah Real Madrid tan hlawhtlinna hrang hrang a chang tawh.