Post Malone & Morgan Wallen ‘I Had Some Help’ a la Hot ber

Post Malone ‘I Had Some Help’ featuring Morgan Wallen chu Billboard Hot 100 (singles) chart-ah a No.1 a, he chart-a kar li a No.1-na a ni ta. Hetihrual hian Eminem hla thar ‘Houdini’ pawh No.2-ah a debut.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
‘I Had Some Help’ hian stream maktaduai 45.6 leh sales 14,000 a la nei thei a, radio airplay pawh ngaithlatu maktaduai 59.3 an la tling a, hei hi chart-ah a No.1 pui leh ta a ni.
Eminem hla thar, zaithiam leh milar hrang hrang hming a chham chhuah leh nualna hla, ‘Houdini’-in stream maktaduai 48.8, sales 49,000 leh radio airplay-ah ngaithlatu maktaduai 4 neiin, No.2-ah a debut. He hla hi Eminem studio album 12-na ‘The Death of Slim Shady (Coupe De Grace)’, tun nipui chhunga a tlangzarh tur atanga a lead single a ni a, Eminem hla he chart top 10-a lang thei 23-na a ni a, he chart top 10-a hla 23 chin nei thei zaithiam 18-na a ni bawk. Tun hi February 2020 hnua he chart top 10-a a lan lehna hmasaber a ni.
Tommy Richman ‘Million Dollar Baby’ chu No.3-ah bawk awm lehin, Shaboozey ‘A Bar Song (Tipsy)’ pawh No.4-ah bawk a la awm a, chart No.1 hlui Kendrick Lamar ‘Not Like Us’ chu No.2 atangin No.5-ah a tawlh ve thung.
Sabrina Carpenter hla ‘Espresso’ pawh No.5 atangin No.6-ah a tawlh a, cart No.1 hlui Hozier ‘Too Sweet’ chu No.8 atangin No.7 a kai thar leh a, chart No.1 hlui bawk Teddy Swims ‘Lose Control’ chu No.7 atangin No.8-ah a tawlh a, Benson Boone ‘Beautiful Things’ chu No.9-ah bawk awm lehin, Zach Brywn ‘Pink Skies’ chu No.6 atangin No.10-ah a tawlh ve ta bawk.