Potter leh Rodgers Out

Last updated Apr 3, 2023 26 0

Pathianni khan English Premier League manager pahnihten ban an tawk a. London club lian Chelsea chuan an manager Graham Potter an ban a, Leicester City pawhin an manager Brendan Rodegers an ban ve bawk.
EPL table-ah 11-naa tlahniam Chelsea hian Thomas Tuchel hmunruak luah turin Brighton manager Graham Potter chu September 2, 2022 khan an ruai. Brighton atanga Potters an khul chhuahna zat chiah tarlan ni lo mahse Potter hi manager manto ber anga sawi a ni tho thung. Brighton chet thatpuitu Potter hnuaiah Chelsea an chetha lo hle. Bazar nan £550m chuang zet seng mah se Blues hian EPL-ah top 10 huang an luah phak tawh lova, Pathianni zana an mikhual Aston Villa lakah si hnih faia an tlawm hnu khan 11-naah an tawlh hnung.
Stamford Bridge-ah ngei Aston Villa hneh lova an mualpho leh tak vangin Potter lakah dawhtheihna an nei tawh lova, thla sarih hnu lekah an inban fel ta nge nge. Potter hnuaiah Chelsea hian inkhel vawi 31 an hmachhawn a, vawi 12 an chak laiin tlawm zawkah vawi 11 zet an tang. Chelsea manager nghet nia, game 20 kaihruai tling zingah Glen Hoddle nen record nei chhe ber an ni.
Chelsea manager thar ni turin Bayern Munich manager hlui Julian Nagelsmann chu rinkai ber a ni a. Tottenham manager hlui Mauricio Pochettino pawh Chelsea board te chuan an manager thar atan an awt bawk niin tarlan a ni. An manager thar tur inrinsiakna tam viau mahse Blues hian season tawp hma chuan hmanhmawh taka manager thar tuar chuk chuk an tum lem lo thung.
Chelsea in Potter an ban rual hian Pathianni zan vek khan Leicester City chuan an manager Brendan Rodgers an ban bawk. Table hnuai ber dawttu-a awm mek Leicester City hian kum February 2019 khan manager tawnhriat nghah Rodgers hi an manager atan an ruai tan a. Kum 2021 khan FA Cup-ah Rodgers hian a champion pui nghal. Inelna hrang hrangah Foxes hi vawi 204 kaihruaiin, vawi 92 a chakpui hman a. Foxes a chakpui zat hi 45.1% ni. Season dangah chetha thawkhat viau mah se season kal mekah an talbuai ta tlat thung a. EPL-ah vawi 28 khel tawhin point 25 chauh an hmu a, 19-naah an awm mek. Tlahniam thei dinhmuna an din vangin chhanhimna an zawng a, an manager Brendan Rodgers an ban zui ta a ni.
Potter leh Rodgers ten ban an tawh leh tak vang hian season kal mekah EPL manager 13 ngawtin club an chhuahsan tawh a. EPL-ah season khata manager in an club an chhuahsan tam ber tum a ni.