Power-a intodelh leh inrenchem…

Power & Electricity changtu minister F.Rodingliana chuan ‘Power-ah Mizoram kan intodelh theih nan sawrkar laipui mai kan dawr lo va, foreign thlenga dawrin hma kan la mek a… kum 5 chhungin Power-ah intodelh kan tum dawn…,’ tiin a sawi a. Ni zung chakna hman tangkai lehzual tum a nih thu sawiin Rooftop hmang tangkai chungin, Solar Plant liante pawh siam tura hmalak mek a ni, a ti a.
Sawrkar term khat, kum 5 chhunga power-a intodelh hman tuma hma lak a ni tur hi a lawmawm hle mai a; kum nga chhunga intodelh hman hi chu a rinawm chiah lo va; mahse, intodelh hman tuma hma lak a nih phawt chuan, nasa takin power lamah hma kan sawn phah ang tih erawh a rinawm thung.
Ni zung chakna hman uar a ni tur hi a lawmawm lehzual a. Sawrkar department hrang hrangte hian an office building chung zawl (rooftop) hi ni zung chakna lak khawlna buzaawlah han chhuah theuh se, power grid lei ngai lo deuhthawin office tin mai hian in chung zawl power hi hmang thei vek se chuan, ram tha lai tuikhuaha chimpil tir vak pawh ngai lovin kan khawsa thei maiin a rinawm.
Tuikhuah hmanga power siamchhuah hi chu kan ram hian a la mamawh belh a, ram tichhe zau lutuk lovin, tuikhuah pahnih khat hi chu din leh ngei theih a tha.
Tuna power lei nana thla tina kan sen ral thin hi cheng vaibelchhe 25 vel a ni a. Power-a kan intodelh theih chuan thla tin cheng vbch 25 vel kan save thei dawn tihna a ni a, chu chu kum khatah chuan cheng vaibelchhe 300 (Nuai 30,000) tihna a ni a. Hei bakah hian, power kan hnianghnar chuan hmasawnna hna hrang hrang pawh sawt zawkin a thawh theih ang a, thawhchhuah zat pawh a pung nasa hle dawn a. Power-a intodelh theih hian kawng hrang hrangah hlawkna a pawchhuak tel teuh dawn tihna a ni.
Sawrkarna la chelh ve ngai lovin sawrkarna an chelh a, ‘kan ti ang’ an tih hi, sawrkarna lo chelh ngun tawhten an tih leh thin loh ang kha chu ni lo turah ngai ila, theihtawp chhuahin hma han la tak tak teh se.