Power Mw 2400 pe thei ruahman tum dan inhrilh

Power Mw 2400 pe thei
ruahman tum dan inhrilh
New Delhi-a cham mek chief minister Lalduhoma chu Ministry of Power hnuaia awm Satluj Jal Vidyut Nigam (SJVN) Limited hotuten lenchilhin, Chhimtuipui lui pawhtu Darzo lui rinchhana kawlphetha megawatt 2400 pe chhuak thei tur project ruahman a nih dan leh bawhzui zel dan tur an sawipui.
Thawhlehni khan chief minister hian Union minister of Power Manohar Lal a hmuhnaah 10% GBS leh RDSS hnuaia Mizoram sawrkarin project proposal a thehluh leh kawlphethaa Mizoram hmasawnna tur hrang hrang a sawipui a. Hemi bawhzui hian Nilaini khan SJVN chairman & managing director Sushil Sharma leh an hotu dangte chuan chief minister hi Mizoram House-ah an hmu a, kawlphetha megawatt 2400 pe chhuak thei tur Darzo Luia Pumped Storage Project an ruahman dan an hrilhfiah a. Hmalak zui zel dan tur an sawiho.
Union minister of Housing and Urban Affairs ni bawk Manohar Lal a hmuhnaah hian chief minister chuan Thenzawla Peace City dinna atana detailed project report siamna tur sum vaibelchhe 10, Ministry of Housing & Urban Affairs-in a pek avangin lawmthu a sawi a ni.
Hetihlai hian Nilaini khan Union Jal Shakti minister CR Patil chuan Lalduhoma hi a chenna inah lengah sawmin, Mat Luia Integrated Water Resources Management Project chungchang a sawipui.
Mat Lui Project hi thlai chawmtu tur tui lakna leh mipui tui tlan tur lakna atana ruahman a ni a. Brahmaputra Board nena hma lak tura tih niin, chak taka bawhzui nise, an ti.