Primary school zirtirtu zaa 45an awmna tur post-ah awm lo Education minister

Mizoram sawrkar hnuaia zirtirtu tam tak mahni post-ah an awm loa, primary school-ah zaa 45 chu mahni post-a awm lo an ni tih School Education minister Dr Vanlalthlana chuan a sawi.

Mizoram Education Reforms Committee buatsaihin The Mizoram Education (Transfer & Posting of School Teachers) Rules 2025 chungchangah Zirtawpni khan an inrawn khawm a. Hmanpuitu School Education minister chuan zirtirtu transfer chu a hautak a, dilna thahnem tak a lut reng a, zirtirtu harsatna hrang hrang nei - nu leh pa enkawltu an nih avanga transfer dil, politics thila transfer nawrna, chhungte dam lohna avanga dil leh chhan tha tak tak nei an ni a, dilna chinfel chu hna hautak a ni tih a sawi.
Tun dinhmunah thingtlang atanga Aizawla sawn luh an tam chhan chu, zirtirtu senior-te hi Aizawlah post an tam a, an pension zel a, an aiawh post ruak hnawhkhat turin thingtlang ami sawn luh zel an ngai a, Aizawla lut an tam lo thei lo tih a sawi a ni.
Transfer & Posting Rules chu Mizoram Education Reforms Committee (MERC) in vawi tam a thlirho a, khawtin khawih leh thawktu ngah ber department a nih bawk si avangin inrawn khawm buatsaih a ni, tiin, “Transfer & Posting Rules hman theih leh hman ngam siam chhuah a ngai a ni,” Dr Vanlalthlana hian a ti.
School Education director Angela Zothanpuii pawhin school academic session, school timing leh school uniform chungchangah inrawnkhawm a lo ni tawh tih sawiin, transfer chungchang chu School Education department-ah hna hautak tak leh lian, inleng pawh an tam chhan ber a ni tih a sawi.
MERC member Dr Rohmingmawii sawi danin, kum 2020 khan gazzette chhuahin rules duan a lo ni tawh a, state thenkhat rules-a a hman ve theih enin siam a ni. MERC-in vawi engemawzat a thlirho tawh a. Online portal hman a ni dawn a, transfer theih hun chhung transfer window a awm dawn a, inrawnkhawmna leh rawtna dawn atangin siamthat ngai lai siamthat a ni dawn.
Inrawnkhawmnaah hian School Education officer-te, service association hrang hrang hruaitute, mimala rawtna neite an tel a, siamthat an duh lai an sawi a ni.