I cholesterol a sang em? Cholesterol \ha lo tihniam thei thei lo ei teh le

I cholesterol a sang em? Cholesterol tha lo tihniam thei thei lo ei teh le
Kan thisenah hian cholesterol a awm a, chu chu kan taksain cell hrisel siam nan a mamawh, mahse, cholesterol chu a tam lutuk cuan lung (heart) lam natna risk a tisang ve leh thung si a ni. Kan thisena cholesterol awm chu a sang lutuk tur ven theihna tha leh awlsam tak pakhat chu thei ei tam hi a ni. Tun tumah chuan cholesterol tihhniam nana tha thei ni a Times of India-in a tarlan te kan rawn chhuah chhawng dawn e.
Engtin nge thei-in cholesterol a tihhniam theih? Thei-ah hian fiber a awm thin a, chu chu vitamin leh antioxidant te nena an thawhho chuan lung hriselna atana chaw tha tak a lo ni thin. Theia soluble fiber awm te chu kan thisena cholesterol tha lo level tihhniam nana tha tak an ni a, chung zinga thei tha chi li te chu:

1. Thei thur: Citrus fruits an ti a, thei thur kan tih ang chi ho hi an ni mai e. Heng thei thurah hian vitamin C a tam tlangpui a, serthlum, lemon/limbu/Nimbu, sertawk etc te ang chi te hian soluble fiber, pectin an tih mai an pai hnem hle a ni. Heng pectin hi cholesterol tha lo, LDL cholesterol level tihniam theitu a ni.
   Thei thur chu engtia ei tur nge? A tak ei emaw, a tui sawr emaw pawh a tha ve ve. Tukthuan ei khamah heng ser chi hrang hrang te hi a tak ei emaw, a tui sawr tharlam in emaw a tha ve ve. Chutihrualin sertawk hi damdawi (prescirption medication) nena inhne rem vak lo a awm theih avangin regular taka sertawk ei dawn chuan mithiam rawn hmasak a tha ang.
2. Apple: “Nitin apple pum khat ei ziah ila doctor râwn ngai loin kan awm phah thei” te pawh an lo tih thin kha, lung (heart) hrisel nan pawh a tha hle. Apple-ah pawh hian cholesterol tha lo tihniam thei pectin a awm a, hei bakah hian soluble leh insoluble fiber a pai hnem ve ve bawk. Regular taka apple ei hian cholesterol tha lo, LDL cholesterol chu hmuh theihin a tihniam thei. Apple-ah hian antioxidant, polyphenols an tih a awm a, chu chu thisenzam vengtu tha tak a ni bawk.
   Apple chu engtin nge i ei ang? Tukthuanah apple ei tel ziah thei la a tha khawp mai. Salad-ah te pawh apple chu telh theih a ni. Hetihrual hian apple chu a tui sawr (apple juice) in aiin a taka ei zawk tur a ni.
3. Avacado: Avacado hi butter fruit te pawh kan ti, monounsaturated fats a pai tam hle a, chu chu fats kan tih zingah rau rau pawh fats hrisel a ni. Cholesterol-ah pawh hian a tha chi, HDL cholesterol a awm a, avacado chu HDL cholesterol level titam theitu leh LDL cholesterol tihniam theitu a ni. Mithiamte chuan nitin avocado pum khat ei ziah hian cholesterol (LDL) level a tihniam thei niin an sawi.
   Engtin nge avocado chu i ei ang? A tak ei mai theih a ni a, rawt diakin chhangah te pawh butter kan tat ang deuhin tah ve theih a ni a, sandwich siam nan leh salad-a te pawh a telh theih.
4. Balhla: Balhla-ah hian soluble fiber a tam a, sterol a tam bawk a, chumi pahnih thawk dun chu kan taksa a cholesterol tha lo level tihniam theitu tha tak a ni. Fiber a tam avangin chaw paitawihna lam tam pawh a tha a, lung hriselna atan a tha hle bawk.
   Engtin nge balhla chu i ei ang? Tukthuan ei khamah te balhla chu an ei zauh la. A nih loh pawhin banana smoothie te pawh siam la. Balhla chu a tuisawr (jucing) loh tur a ni, hetianga tih chuan a thatna (fiber) a bo thei.
   Cholesterol tha lo tihhniam nan thei a tha kan tih rual hian ei dan chintawk erawh hriat a tha a, a tha tih vanga tum khat tam tak ei teuh teuh lam aiin regular taka a tawk chauh a ei tur a ni zawk. Hei bakah hian a tharlam (fresh) ngeia ei a tha ber a, thei chi khat chauh ei bik lovin a chi hrang hrang ei lawr thiam te a tha. Chutihrualin eng company-in emaw a bawma an rawn pack te aiin a fresh ngei ei zawk tur a ni.