Private hospital leh sawrkar hnathawk barhluih tum an ni – Dr Lalmalsawma
Private hospital leh sawrkar
hnathawk barhluih tum an ni
– Dr Lalmalsawma
Sawrkarin Mizoram Universal Health Care Scheme kalpui a tumnaah private damdawi in ho leh sawrkar hnathawkte chu barh luih tumin a bei a, sawrkar hnathawkte phei chu an dikna chanvo a palzut sak tih Congress hruaitu Dr Lalmalsawma chuan a sawi.
MPCC treasurer Dr Lalmalsawma Nghaka chuan, pawisa pe lo (cashless) a damdawi ina inenkawl theihna Mizoram Universal Health Care Scheme (MUHCS) chu scheme tha tak, mi harsa zawkte tan phei chuan a aia tha a awm chuang loang tih tur a nih laiin, sawrkarin kalpui a tum dan a fuh lo hle tih a sawi.
“Damdawi in lian – ZMC&H leh Civil Hospital hian min dawl zawh loh avangin private hospital tel lo chuan a hlawhtling dawn lo tih a chiang. Private hospital neitute sawi dan atangin sawrkar hian an duh ang barh luih tumin hma a la a ni awm a, private hospital neitute vauna tawngkam pawh sawrkar lam atangin a chhuak ni awm hi a pawi hle,” a ti.
MUHCS hlawhtlinna atan private hospital-te a mamawh avangin inbiakpui a, rate leh bill pek dan bakah sawrkarin security a pek theih dan thlenga sawihoa inrem tur an nih laiin, ZPM sawrkarin an duh anga engkim kalpuiin zawm turin a nawr lui nia lang chu thil nihphung tur a ni lo tih a sawi bawk.
“Private hospital-te nen hian scheme kalpui a nih hma in awmze neia inbiain inremna an lo nei lawk vek tur a nih laiin, ZPM sawrkar chuan kawng bo takin he scheme hi kalpui a tum a. Hei hian administration an hriat loh zia leh an thiam loh zia a lantir a ni,” MPCC treasurer hian a ti.
MUHCS-ah hian tun thlengin mi 5000 vel chauh an la inziaklut chu mipui pawhin rinhlelhna an la nei lian hle tih a lan thu leh, a bikin sawrkar hnathawk harsatna tawk pawh an awm nual tawh tih a sawi a ni.
Sawrkarin phailam hospital thenkhat inremna siampuiin reimburse theihin an kalpui nia sawi chu a serious hle tih a sawi a. Mizorama private hospital-te hmelma en titiha a en lai a, phai hospital-te duhsak zawk anga a che chu, mipui tawrhna thleng thei thil sawrkarin engahmah a ngai lo a ang hle tih a sawi.
Sawrkar hnathawkte hlawh cut luih sak nia lang pawh a serious tih Dr Lalmalsawma hian sawiin, “Sawrkar hnathawk hian dan hnuaiah an hlawhah thu an nei a, chu chu an dikna chanvo a ni. An hlawh cut tur chuan anmhni phalna ziak ngeia a awm a ngai. ZPM sawkar hian an right rahbeh sakin an cut luih sak a. Sawrkar hnathawkte hian an hlawh cut hi an ui hran loang, health care system kalpui dan fello vangin tun dinhmunah he scheme hi an duh lo a ni,” a ti
MUHCS-a mipui thawh ve tur sum chu a tam avangin chhungkaw thenkhat tan a hautak a. State thenkhatah chuan a thlawna an tih thei bakah Mizoramah pawh Congress sawrkar laiin Rs. 500, Rs.750, Rs.1000 chhungkaw khatin an thawh a, healthcare-a chungkua inziaklut pawh nuai chuang an ni tih a sawi bawk.
“MUCHS-ah hian mipuiin an thawh ve tur, a premium hi ennawn a, mipui zawh tawka kalpui a tul a. He scheme mumal lo taka kalpui a tum hi ZPM sawrkar hian ngaihtuah tha se, private hospital-te inrem pui thuai se, hlawhtling takin kal se tih hi kan duhdan a ni,” a ti.