Pro Volleyball-a tel zui turin TNT-in playoff an paltlang an ngai!

Pro Division hmun ruak pahnih hnawh khat turin playoff khelh a ni dawn a, Pro Volleyball League-a tel zui zel turin Thutak Nunpuitu Team-in playoff an paltlang a ngai dawn.
Pro Volleyball League inkaihhruainaah mipa team pariat an tel thei ang tih a awm sa a, Inrinni khan a vawi khatna’n 2026-27 season atan Mizoram Volleyball Association (MVA) executive committee thu khawmin season tharah Pro Division mipa inelnaah team pariat tel turin thutlukna a siam a ni.
Season liamtaah mipa team pasarih inelin, TNT an hniam ber a, a sang paruk – Hunthar, Khawbel, Anastasia Electric Veng, Chhinga Veng Spikers, Sihphir leh Tuichangralin Pro Volleyball an khel zui thei dawn a; hmun ruak dang pahnih inchuhin TNT leh district team thate’n playoff an khel dawn a ni.
District association hnuaia season khat chhunga sang ber leh pahnihnain Pro Division playoff an khel thei a, he’ng team-te hi an inhuam a nih chuan July ni 4, 2026 tlai dar 3 ral hmain MVA hnenah dilna an thlen ang.
District association hnuaia sang ber leh pahnihnain playoff khelh an inhuam lo thei a, khelh inhuam team dang an awm a nih chuan an district hruaitute hriatpuinain dil theihna kawng hawnsak a ni bawk.
July ni 9, 2026 atangin playoff khelh tan a ni dawn a, district association hnuai atanga telte inelin, a sang ber an tlang nghal ang a, pahnihna leh season liamta Pro Division-a hniam ber TNT-in hmun ruak pakhat an inchuh zui leh dawn a ni.
Pro Division playoff-a tel tur team-te hian season liamtaa player an neih sa bakah Pro Division player ni lo pahnih theuh an lak belh thei a, hnam dang lak erawh phal a ni lo.
Player an lak thar turte hi district association hriatpuinain an kalpui ngei tur a ni bawk.
Pro Division club-te tan playoff khelh zawh July ni 21-25, 2026 chhungin season thara an player-te ziah luhna hun hawn a ni a, hemi chhung hian district leh zone hnuaia club hrang hrang player-te pawh an inziaklut ve nghal dawn a ni.