Volleyball hmanga inelna lian leh ngaihhlut hlawh tak Tata SK 712 Pro Volleyball League chu Jenu 2, Zirtawp zanah khelh tan a ni dawn a. Inkhel hmasa berah nikum final-a intawng Durtlang North leh Thutak Nunpuitu Team an inhmachhawn dawn a. Mipa leh hmeichhe lamah final rematch hmangin season thar bul tan a ni ve ve dawn.
Ninganiah Hawla Indoor Stadium Conference Hall, Republic Vengthlangah Mizoram State Sports Council Secretary Pu John Tanpuia’n fixture leh handbook a tlangzarh.
Tarlan tawh angin Tata SK 712 Pro Volleyball League 2023 hi June 2, zirtawpni zan dar 8:00-ah a hawn nan TNT-in nikum final-a an tlawmna chhang let nghal thei turin hun tha an nei dawn a. Final hmuhnawm takah 25-20, 23-25, 25-21 leh 25-23 (3-1)-a an hneh loh Durtlang North nen an inkhel ang.
Tata SK 712 Pro Volleyball League hi R Dengthuama Indoor Stadium, Mualpuiah vek khelh a ni dawn a; June 8, ningani tlai dar 3:30-ah 2019 champion Chhinga Veng Spikers leh kai thar Tuichangral, zan dar 8:00-ah vawi khat aia tam champion thei awm chhun Hunthar leh Tuichangral intawngin mipa team parukin round khatna an khel zo ang.
Pro Volleyball League 2023-ah hian hmeichhe team tha parukin title an inchuh dawn bawk a. Nikum final-ah Bethlehem Vengthlangin 18-25, 25-21, 25-14, 25-20 (3-1)-in Bungkawn an hneh. Hmeichhe lamah final-a intumte hmangin season thar bul tan a ni dawn bawk a. June 3, inrinni zan dar 8:00-ah hmeichhe league inkhel hmasa berah an intawng leh nghal dawn a ni.
June 5, thawhtanni zan dar 8:00-ah Kanan leh Durtlang; June 6, thawhlehni zan dar 8:00-ah kai thar ve ve Luangmual leh Power Department Sporting Club inkhelin round hmasa ber an zo ang. June 29, ningani zan dar 8:00-ah hmeichhe final khelh a ni dawn a, a tuk zan dar 8:00-ah mipa final khel zuiin Mizoram volleyball inelna sang ber season rukna zawh a ni ang.
Volleyball hmanga inelna ngaihhlut hlawh tak Pro Volleyball league-ah hian nikumah mipa team nga leh hmeichhe team liin title inchuhin kuminah team tel pathumin an tam zawk a; team tinin Mizoram pawn atangin an duh zat player la lut thei mah se khelmuala lut paruk zinga state pawn player pakhat bak hman theih a ni lo.
Pu John |anpuia chuan Pro Volleyball team-te duhsakna a hlan rualin volleyball hmasawnnain hma lam a pan zel dawn tih a sawi. “Volleyball hi Mizoten kan tui em em a, thingtlang kilkhawr berah pawh kal ila hmun rem laiah inkhelhna a awm zel a ni. Sports Council-in dressing room leh gallery awm telna tur volleyball court thar 30 a siam mek a, volleyball stadium din turin hma a la mek bawk a, hma lam hun eng tak a nei a ni,” a ti.
-- Advertisement --
PRO VOLLEYBALL LEAGUE
MIPA
2016 : Champion – Anastasia Electric Veng,
Pahnihna – TNT
2017 : Champion – Hunthar
Pahnihna – Chhinga Veng Spikers
2018 : Champion – Hunthar
Pahnihna – Tuichangral
2019 : Champion – Chhinga Veng Spikers Pahnihna – Durtlang North
2022 : Champion -Durtlang North
Pahnihna – TNT
HMEICHHIA
2017 : Champion – Power Department
Sporting Club
Pahnihna – Electric Veng
2019 : Champion – Durtlang
Pahnihna – Bungkawn
2022 : Champion – Bethlehem Vengthlang Pahnihna – Bungkawn