PSG tana French Super Cup chang turin Dembele goal khat a tawk

PSG tana French Super Cup chang turin Dembele goal khat a tawk
Paris Saint-Germain chuan tun Pathianni kalta khan an mihang forward Ousmane Dembele goal khat thun hmangin AS Monaco lakah 1-0 hnehna an chang a, a zawn zata a season thumna atan French Super Cup trophy an chang.
Europe leh South America lama football ram liante’n an tualchhung football huang zauhna leh sum zawnna atana inkhel thenkhat Arab rama an nghat thin angin French-hp pawhin an Super Cup hi Doha khawpuia khelmual dangdai zet Stadium 974 an tihah an nghat a; he stadium hi 2022 World Cup thlenna pakhat atana an sak kha niin, lawnga an thil phurhna (shipping container) 974 zet an tihdanglam (recycle) hmanga sak a ni.
Qatar ram khawpui ber leh an sumdawnna hmunpui ber ni bawk Doha khaw inkhelah hian Ligue 1 champion PSG lamin goal thun tumin tum 27 ngawt chance nei mah se chu’ng zinga vawikua chiah chuan target a fuh a, hun pangngaiah goal an khung zo lo nge nge dawn nia a lan hnu hun pekbelhah Dembele chuan team pahnih inkara danglamna thlentu goal a khung zui ta hram a ni.
Ligue 1 champion leh runners-up team-te inbeihna ngaihven hlawh French Super Cup-ah hian record siamin season liamtaa Ligue 1 leh French Cup title latu PSG chu vawi 13 an champion tling thei ta a, tunhnai kum 12 liamta chhunga he trophy vawi 11 an lakna ni bawk.
Stadium 974 inkhelah hian goal a lut thei lo tih lohah chuan inkhel nung tak a ni a, penalty pet hmanga team pahnih pawhthen an ngai dawn ta nia a lan hnu hun pekbelh minute hnihna a kal mek laiin Dembele chuan Fabian Ruiz chhawpsak ball hmangin chakna goal awmchhun a thun.
Nikum nipui laia an sengluh Desire Doue chuan tan atanga minute kuana lekah PSG hmahruaina tur a khung teuh viau a, mahse, goal kham a petper a; Lee Kang-In pawhin goal lawm tur a nei hman thuak a, mahse, first half hun pekbelha a goal tur chu Monaco goalkeeper Philipp Koehn chuan a dansak.
A tir lam minute 45 chhungin Dembele leh Vitinha pawhin Koehn an fiah a; chutih laiin Monaco tana Maghnes Akliouche leh Takumi Minamino-te goal tur pawh PSG goal-veng Gianluigi Donnarumma chuan a dansak ve bawk.
PSG keeper hi hmai hliam avanga a chawlh vang vang hnua khelmual lut leh hlim a ni a, Arab ramah rintlak a nihna a pholang leh nghal.
Tun kha kum 2010 hnu lamah French Super Cup first half-a goal a luh loh tum khatna niin, kum 2010 khan penalty petah Olympique de Marseille chuan 5-4-in PSG an hneh.
French Super Cup khelh hnuhnung pahniha Nantes leh Toulouse hnehtu PSG hian thla hmasa Ligue 1 lamah 4-2-in mualneitu Monaco an lo hneh tawh bawk a, kha mi tuma second half goal hnih kha Dembele thun niin, Pathianni zanah pawh Monaco lungaihna thlentu a ni zui leh.
|um li lai French Super Cup la ve tawh Monaco kuta he trophy a luh hnuhnun ber chu kum 2000 daih tawh kha niin, kum 2017 leh 2018-a runners-up an nih tum pawh khan an hneh loh chu PSG hi an ni!
Kartawp Pathianni hian tualchhung league lamah PSG an kirleh tawh dawn a, St Etienne an mikhual ang a, Zirtawpni zanah Monaco-in Nantes an luhkhung ve bawk ang.