PU TRUMP-A THLAN NAWN TITI Rev Dr Ramengliana

Rev Dr Ramengliana
United States nge nge a ropui kan ti lo thei lo. An President thlan boruakin khawvel a chiah hneh hle. Keini ho, he khawvel ram zauvah kan awm ve tih pawh an hriat lem lohte hian kan lo tuipuiin mawihawih pawh dawn zo lo lekin kan lo tan hlur mai zawng a nih hi. Mahse, a pawi lo ve. Europe-a Kristian ram tih thin ram tam tak thlarau lama an zal der tawh hnuin US hi chu rinna kawngah hian an la tha riau va. Khu rama Kohhran a chauh chhiat hunte a lo thlen vaih chuan, he khawvel pumpuiah hian nghawng nasa tak a nei tura ngaih theih a ni. Chuvangin kan rilru a la thui bik ni pawhin a hriat thin.
Pu Trump-a leh politics
Pu Trump-a hi a tirah chuan politician ni lovin sumdawng hausa a ni a. A upat lama politics khawvel lo zuang lut ta a ni a. Keini ang mi vengva lem lo tak phei chuan tunhmain a hming hi kan lo hre ve lem lo va. Mahse, American ho zingah chuan tlangval hmeltha, smart leh hausa angin a lo lar viau thin a ni awm e. Milar leh thiltithei dang ang thovin politics-a zuan luh leh luh loh chungchang zawhnate pawh a tawng fo ngei ang. A tum lo hle thin ni ngei tur a ni. Tuna ama party Republican a hmuhsitzia video clip pawh hi ka hmu ve tawh. A hma lam hun a hriat lawk bik lohzia a chiang hle mai.
President a nih tum khatna kha chu a la hriat thiam theih a. Khatih lai khan kum 70 a ni tawh a, uai thla lam a ni deuh tawh. America President tur chuan a upa deuh tawh emaw a tih theih a. Mahse a vanneih a siam nge ni, tunhmaa thleng ngai lo a khingpui kha hmeichhia a ni tlat mai a. A thatpui ta a ni mai thei. Hilary Clinton, nu zawng zinga fing leh fel, US First Lady pawh kum 8 lai lo ni tawh, a pasal Bill Clinton-a meuh pawh amah avang chauhva US President ni thei anga mi tam takin an sawi hial nen an intawng a nih kha. Mi tam takin Trump-a khan a hneh turah an ngai lo va. Mahse American tam zawkin an President atan em chuan ‘nu’ chu an lo iai deuh emaw ni dawn ni, a tling zawk ta rup mai a nih kha. Feminist tam tak chuan patriarchy vang an ti hlauh mai thei. Dik pawh a dik mahna le.
Chutih laiin a term hmasa kha chuan a che fuh vek bik lo va. Kristiante tan pawh kawl a eng uar uar chuang lem lo a nih kha. Puhchhiatna tur a tam a, tax awl ruk leh dawt sawi hmang tak angin miin an sawi thin. Ani hi pa ti thur thur, thil sawi ve mai mai ang deuhva a lan chang pawh a tam. |awngkam thiam leh smart Bill Clinton, Barack Obama te nen chuan dang tak an ni. Mi te mitah pawh a hniam chho viau ni tur ngei a ni, inthlan dawn reng khan poll ho khan chak turah an ngai tawh lo. Joe Bidena, veteran politician, Barack Obama hnuaia Vice President lo ni tawh thin khan a rawn hneh let ta rup mai a nih kha. A term hnihna tura a tlin zawh loh chungchangah titi a tam hle, mahse khual thuthang leh ar pan chuk mai mai hi chu thutakah ngai tha duh lo thung ila. A tih awm loh tak tak a ti hnem viau tih erawh ngaihventute chuan an hre mai thei thung.
Oldest Comeback Kid
Khatih lai khan Pu Trumpa kha kum 74 a ni tawh a, politics a ‘comeback’ a neih theih hi ka ring pha tawh lo hrim hrim. Inthlan lehah chuan kum 78 a ni tawh dawn si a, a tan kawng a tawp tawhin a lang. George Bush Sr. kha kum 64-ah President a ni a, Jr. kha 54-ah; Bill Clinton, 46-ah, Barack Obama, 47-ah; pavalai tak vek an ni thin. Biden leh Trump lo hi chu kum 70 pelh hnua America President ni ta an la awm miah lo; an hun hmaa upa ber chu Ronald Reagan, kum 69 a nih kuma an thlan tak kha a ni. Heti a nih avang hian keini ho hi chuan America President chu smart veh vawh, pavalai tak ni turin kan lo ngai thin kha a nia. A nih vawi khatnaah pawh upa kan lo tih tawh Trump-a hi rawn ni leh thei turin kan lo beisei tawh lo. Mahse, a ni leh tlat si hi thil mak tak chu a ni phawt mai. Anni pawhin, ‘The Greatest Political Comeback in Recent Times’ an ti reng a ni.
Pu Trump-a vanneihna hi a inher chhuak ve hrim hrim niin a lang. Democrats ho khan President ni lai na na na chu term hnihna atana vawrh loh theih loh a ni ang a. Pu Bidena lah chu a lo tar riau tawh niin, debate hmasa berah chuan a mualpho nasa ta mai a. Rem teh tut lo mah se an han thlak chawp chuk chuk a nih kha. Chutih laiin President em atana an iai deuh tura ka lo ngaih ve ngawt Kamala Harris, Vice President candidate, kha vawrh loh theih loh a lo nia. Kamala kha a VP record pawh a tha vak lo an ti nghe nghe a ni. Pu Trump-a a phur telh telh a ni ber e. Chutih laiin mipui khawngaih thla la turin mi awm herh pakhatin a lo kap bawk nen. A tir atang khan tling zawk turah ka lo ngai ve hmiah a, zawlnei lo pui hian ka lo ring ding ve chut a nih chu! Pu Trump-a mak ve deuhna (vanneihna?) chu President inchuhnaa a khinte hi ‘nu’ ve ve zu nia!
Ram ropui ber a tla hniam ta em ni?
Hetia Pu Trump-a tlin a lawmawm viau lai hian America ram hi an tla hniam tawhin ka lo hre ve leh tlat mai nia! Kan college kal lai vel kha chuan India ram politician-te tar theihzia leh US, Canada, UK, adt., tih vela an ram hruaitute la naupan hlawm siziate kan lo sawi ve fo thin. Tunah chuan kan hnung an rawn zui emaw tih mai tur a ni ta zawk tlat. |hangthar mi tha an nei ta lo em ni? tia zawh theih tak a ni. Putar ve ve inbeih an tum a, putar pakhat nu pakhatin a rawn thlak ringawt anga lang hi chu a mawi chiah lo deuh lo maw! Republican party-in Pu Trump-a ni lo, ani duh ang tho duh mi, valai zawk vawrh tur an nei lo hi pawi ka ti. Chutiang thovin Democrats lam pawh.
Tunhma deuha George Bush Sr. term hnihna tur Bill Clinton-an a rawn lehthal tumte kha a pui mawle. A tirah chuan Bush kha tling chhunzawm mai tura ngaih a ni a, mahse kum 46 mi chauh Texas Governor, ram pum huapa mi hriat la hlawh nasa lo tak khan a rawn vawrh thla hneh khawp mai. An debate apiang khan Clinton-a ratings kha a sang chho zawt zawt mai kha a nia! A fin, tawngkam thiam leh hmelthat a chhawr ka ti mai. Barack Obama leh John McCain inbeih tum te khan President tur an va han nei tha char char. A tu zawk pawh kha tling se pawi lo vek, tih theih- Obama lah Orator dik tak leh idea zau tak nei, McCain lah sipai bang, fing leh pa tawk tak. ‘McCain zawk kha lo tling se US leh khawvelin kan thatpui zawk mai thei,’ te pawh hmeichhe thudawn takin a tih theih awm e. Obama term hnihna rawn khingtu Mitt Romney te kha a duhawm veh vawh asin le. President contest tur an neih that thin nen, tunah chuan an vang ta emaw ni? Ni lul suh se.
‘Vawkpui pawh in-candidate se’ factor
Mizote hi chuan Pu Trump-a hi kan han tan rum tuk mai a. Tui nu deuh pawh lo hmang ta se kan pawmzam thei vek mai awm asin! Israel kan tan deuh tuk ang hian! India rama Pu Modi-a style ang deuh hi US-ah Pu Trump-a chu a ni ve tlat tih hi hrethiam ve mai mai ta ila. India ram sorkarah rawn che dawn se chuan Democrats lam hi kan duh zawk ka ring mah mah thin. Democrats lam hi mi rethei tana inhawng zau, hnam tin chi tin pawm khawm thiam zawk an nia. An zau luatah Gay marriage, abortion tih vel hi an phalrai deuh a, chu lam chu kan helh niin a lang. Sakhaw dang nena inlaichinna thilah pawh US khu sakhaw tin tana zalenna, sorkar pawh sakhaw tih bik nei lo tura duhna a lian a, chu chu Kristian tam takin an tei thei lo a ni. US sorkar chu Kristian sorkar tak ni turin a duh, India sorkar hi Hindu tak sorkar ni tura mi tam takin an duh ang hian.
Eng pawh ni se, Pu Trump-a hi zawngin Pathian hming hi a lam ngam em mai bakah Kristian sakhua hi a tan ngam bawk a, keini ho han tan loh tur ziazang a ni lo. Pathianin mal sawm sela, Pathian Ram zau zelna turin hmang nasa sela a duhawm ngawih ngawih. Amaherawhchu, ringtute hi mihring pakhata innghat tur emaw, a thim a var thlu lova zui mai tur emaw kan ni lem lo tih hria ila. Politics pawh ni se party engemaw tan bik leh duh ngheh bik, ‘kan pawl’ tih tlur bik neih tur ni awm lo tak a ni. Kristianna chu Kristianna a ni a, Republican emaw Democrat emaw, Capitalism emaw, Socialism emaw nen hmehbel a rem lo. Heng zawng zawng chunga leng hian siam that a tulna lai a siam tha a, her rem a tulna hmuna her rem thin zawk tur ni awm tak a ni. Ringtu tha tan ‘Kan party a nih phawt chuan vawkpui pawh in-candidate se ka vote tho ang,’ tih ang chi hi chu a fuh hlel deuh chu a ni. Thil dangah pawh induhsak leh intan avanga inpawmzam mai mai hi nunphung dik a ni lo.
Famkim lohna khawvelah hian tumah sawisel bo kan awm lo va, engmah hi a duhthusam a awm lo tih hriaa ngaihsan chin leh beisei chin neih thiam hi mifing nihna a ni a. Ram hruaitu thlan thar, sorkar leh political party te pawh thutak Pathian Thu atanga teh thiam hi kan tum zel tur a nih hmel e.