Pudina

Pudina
Mint an ti a, pudina tih hi kan hriat lar dan zawk a ni ang. Han ei ila mi a vawng dai sawng sawng thei a, khawvel hmun hrang hrangah hriat lar leh ei nasat a ni. Hetiang pudina (mint) ang chi hi chi hrang hrang 20 dawn a awm niin mithiam ten an sawi a, chung zingah chuan peppermint leh spearmint te pawh hriatlar pawl an ni. Pudina chu sil faia ei mai theih a nih bakah thil chi hrang hrangah a telh theih a, thingpuiah te pawh an telh a, salad leh chawhmehah te pawh an telh thin. Taksa hriselna tur thatna chi hrang hrang a neih Times of India health section-in an tarlan te kan rawn chhuah chhawng e.
1. Chaw paitawih lama harsatna nei, pum nuam lo deuh teuh teuh thin tan a tha. Indigestion hi kan thil ei te kan pumah a awm rei lutuk avangin a lo awm thin a, mithiam te chuan peppermint oil hian indigestion symptom a tiziaawm thei niin an sawi a, pumah kan thil ei chambang rei lutuk tur a veng thei. Zirchianna thenkhat atanga an hmuh danin a oil hi a hnah fresh emaw tihro emaw aiin indigestion tan chuan a tha zawk.
2. Hritlang khawsik damdawi tam takah hian menthol a awm a, chutiang chu peppermint oil-a compound awm ang a ni. He compound hian hnarping (congestion) a tiziaawm thei a, boruak kal vela kawng sial thain, thawk a tinuam thei. Hritlang khawsik i man leh a nih chuan i thingpui in turah te khan pudina telh thin ang che.
3. Pudina hi tam tak kan ei ngai lem lo va, mahse, nutrient a pai hnem hle. Kan chawhmeh siamah te pawh tlem tlemin kan telh thin, a chhan chu a rim a chak that vang a ni. Vitamin A a pai hnem hle a, chu chu mit tana chaw tha a ni. Hei bakah hian antioxidant a pai hnem hle bawk a, chu chuan kan taksa oxidative stress lakah a veng a, free radicals vanga cell chhe tur a veng.
4. Thluak hnathawh a tichak thei. Mint oil rim nam cham cham mai hian thluak hnathawh a tichak thei niin zirchianna neitu ten an sawi. Mi 144-a zirchianna an neih atanga an hmuh danin peppermint oil rim minute nga hnim ringawt pawhin thil chhinchhiah theihna a tichak nghal thei niin an sawi a, hei bakah hian ngaihtuah sawrbing a tiawlsam thei niin an sawi bawk.
5. Vun tan pawh a tha hle. Arngeng nei tan pawh tha tak a ni. Anti-inflammatory leh anti-bacterial properties a nei a, salicylic acid a nei bawk a, heng te hi arngeng damdawi tha tak a ni. Pudina tui sawr chu vun tihfai nan, cleanser anga hman theih a ni bawk. Face mask siam nan pawh a hman theih a, pudina hnah leh khawizu rawt kawi la, hmaiah hnawihin minute 20 vel chiah hnuah phihfai leh mai tur a ni.
6. Depression leh stress nei tan pawh ei chi tak a ni. Pudina hian adaptogenic properties a nei a, chu chu cortisol level siamthatu a ni a, stress a tihniam thei. Pudina chu aromatherapy treatment a hmanin rilru tizangkhai nan a hman theih. Thluakah serotonin a tichhuak a, chu chu min tihlimtu hormone niin, depression symptom a tiziaawm thei. I thingpui inah te pudina telh la, a hnah fresh te chawhmehah hmang la, a oil te pawh vapouriser atan hmang la, a tha hle a ni.
7. IBS (irritable bowel syndrome) nei tan a tha. IBS hi digestive tract lama buaina a ni a, tunlaiah IBS nei kan tam ta hle. Pum puar, pum nuam lo, kawpuar, kawthalo, chau rawih rawih te hi IBS symptom langsar zual a ni a, pudina oil hian menthol a neih avangin IBS symptom a tiziaawm thei. Mithiam ten zirchianna an neih atanga an hmuh danin kar li chhung regular taka peppermint oil ei teah chuan IBS symptom a tlahniam nasa hle a ni.