Pung chak turin nupui pasal innei hma turin infuih a tul

Mizo hnam a lena a ropui zel theihnan pun chak a ngai a, chumi tur chuan nupui pasal innei hma tura infuih a tul tih minister B Lalchhanzova chuan a sawi.
YMA Sub-Hqrs Saitual Inkhawmpui vawi 3-na “Ruihhlo do” tih thupuia hmangin NE Khawdungseia neih, Nilaini zana a hmanpuinaah B Lalchhanzova chuan, hnam anga kan ropuina kan chhawmnun zel theihnan pun chak kan mamawh tih sawiin, nupui pasal innei hma tura infuih thar a tul tih a sawi. Thalaite chu an taksa ruihhlo bawiha pe lo tur leh mahni inkhawngaihna dahthaa hmalam pen turin a fuih.
YMA chu Mizo hnam phuarkhawmtu leh hnam lungphum pawimawh a ni, tiin, ramngaw, nungcha leh lui humhalh kawngah pawh hmalatu, khawtlang nuna thil tha lo, ruihhlo leh eiruk do kawnga theihtawp chhuah thin a ni tih a sawi a. Chhawmnung zel turin a fuih.
YMA Sub-Hqrs Saitual Inkhawmpui hi April 28 atanga April 30 thleng awh a ni a, vantlang inkhawm, rorel inkhawm, hruaitu inthlan leh cultural programme hman a ni. Ruihhlo donaa titha leh ramngaw leh nungcha humhalh kawnga titha YMA Branch-te hnenah lawmman pek a ni bawk.