Punjab-ah Mizo nula chin hriat loh awm

Punjab state-a khawpui pakhat Patial-a lehkha zirlai Mizo nula pakhat chu ni 4 kalta atang khan a chin hriat lohin a awm a, zawn mek a ni.
Thudawn danin, Patiala-a Ph.D ti mek Mizo nula pakhat, Mission Veng ami chu October 28 chhuna an awmna atanga a chhuak chu a chin hriat zui a ni ta lo a, a tuk October 29 khan a bag, ID card leh thawmhnaw thenkhat chu chhar a ni. Police-te pun nghal an ni a, chhuizui mek a ni.
Mizo Students’ Union Gen. Hqrs chuan Punjab-a Mizo zirlai bo thu ah hian chak zawka zawn a nih theih nan Thawhlehni khan larsap hmu in, a tul anga tanpui turin ziak leh tawngka in an thlen. Punjab Police bakah a tul anga Mizoram Police ngei a zawng tura tir turin an ngen a. Punjab-a Mizo zirlai awmte himna tur tha zawk pek an nih theih nan Punjab state thuneitute biaksak turin an ngen bawk.